向東北方出發馬到功成

傳統上在大年初三這日不會去拜年，驚會出現口角傷和氣，若然怕匿喺屋企悶到發慌，不如同屋企人驅車外出行個大運。東南西北去邊好？玄學家林炳南師傅就提議向東北方出發，有助提升馬年運勢，箇中玄機即刻話你知！

黃金海岸一帶有多家食肆，大可在此飽餐一頓先出發。

香港濕地公園內設有觀鳥屋，讓遊人在不騷擾野生雀鳥嘅情況下，靜靜欣賞佢哋嘅美態。

遊人可漫步於公園內特設嘅木橋上，欣賞濕地一帶嘅自然景象。

大樹下嘅「轉運龍洗」，相傳可以幫善信擺脫霉氣、轉來好運。

適逢今日係世界濕地日，最啱到香港濕地公園參觀。

元朗大樹下天后古廟有特式齋菜供應，讓善信大快朵頤。

南涌天后宮供奉天后與海神龍王，吸引唔少善信前來參拜。

朝沙頭角方向而行，會經過昔日邊境禁區檢查站。

站於邊境禁區外，就可睇到左邊深圳、右邊香港嘅邊界情景。

從南涌可以眺望深圳，鹽田港嘅景色盡收眼底。

林炳南師傅指出，泊車時將車頭指向東北方嘅話，都有行大運嘅意頭。

林師傅話東北方正係甲午馬年嘅大利方位，只要向住呢個方向遊車河行大運，就可以幫今年運勢打好個底。至於出發吉時為今日已時，即係上午9時至11時，若然所用嘅車輛係藍、紅、黑三色其中之一，催運能力就更高。行大運之餘，如果你想順道拜神祈福、遊山玩水，兼且擦餐飽嘅話，大可選擇向屯門黃金海岸出發，呢度有多家食肆，畀你出發前先祭五臟廟，時間夠嘅話，仲可以到黃金泳灘漫步，赤口都咁浪漫，馬年仲點會同人勞氣？

誠心祈福　轉運龍洗除霉氣

之後沿住青山公路、元朗公路、天影路而行，大約40分鐘車程後，就會嚟到行大運第二站嘅香港濕地公園，適逢今日係世界濕地日，一場嚟到不妨入內認識自然生態，幫香港嘅大自然環境祈個福都好吖！

欣賞過自然美景後，就去拜神祈福，距離香港濕地公園約15分鐘車程後，就會嚟到十八鄉附近嘅元朗大樹下天后古廟。所謂「古廟」，絕無吹噓，落成至今超過360年，主要供奉天后及觀音等神明，廟旁嘅老榕樹下設有「轉運龍洗」，相傳可以幫善信賣走霉氣，為新一年帶嚟好運。咁快又肚餓？唔緊要，廟內嘅款客堂有精緻齋菜提供，又再添口福。

走入沙頭角　美景當前醒神晒

之後繼續行程，可沿粉嶺公路向東北方而行，大約40分鐘就會到達沙頭角，由於當局大幅縮減咗邊境禁區範圍，所以依家可以驅車自由出入，睇到左邊係深圳、右邊就係香港嘅邊界情景。最後沿路折返，經過沙頭角官立中學後可左轉鹿頸路，朝南涌與鹿頸一帶而行，由翠綠山巒跟沙頭角海拼湊出來嘅景色，似足山水畫咁恬靜有詩意，至於依岸而建嘅南涌天后宮，善信亦可進內參拜天后與海神龍王等神明。唔趕時間嘅話，隨後可以喺近雞谷樹下附近嘅車位停低，遠眺深圳鹽田港，自會發現其實香港有唔少令人心曠神怡嘅自然景色，對於平時生活只係畀屏風樓及自由行包圍嘅城市人嚟講，正好舒舒服服抖番啖氣。