國產手機八核噱頭

國產手機不時有驚喜，好似小米、Meizu等品牌就以超高性價比吸引用家。今期國產陣營又有新噱頭，就係最新八核心處理器。繼THL T100S之後，最近再多兩部內置八核心處理器機款抵港，就係UleFone U692及Newman K2S；分別備有6.5吋及5.5吋大芒，機價都係二千五蚊鬆啲，鍾意試新嘢的話就咪錯過。

$2,499
圓角設計甚有Galaxy S4影子，機背備有1,300萬像素鏡頭，不過鏡頭位置微微凸出，放枱面好易整花。

$2,580
備有6.5吋大芒，用來睇片一流；可惜機身重233g，長期手持都幾攰。機背殼加入橫線花紋，睇落冇咁寡。

支援雙卡雙待，不過採用傳統大SIM，用開microSIM就要加卡套。

撥號前可以於狀態欄即時轉換主SIM，好就手。

雖然採用同一規格，可是K2S的Benckmark比U692低，睇嚟廠商要對系統再加微調。

預載《百度手機助手》，有唔少內地Apps畀你下載。

《iReader》備有大量電子書，內容以中文書為主。

支援雙卡雙待，不過只有SIM 1兼容3G上網，SIM 2僅能使用2G網絡。

內置「SIM卡管理」，可以預設上網、撥號時用哪張SIM卡。

支援「手勢感應」，手掌於機頂位置一掃即可跳播歌曲及轉動主頁，相當過癮。

備有多款主題，感覺清新。

Benckmark得分逾27,000，與之前推出的THL T100S相若。

其實早於上年11月尾，台灣晶片廠商MediaTek已經發布全球首款八核心手機處理器MT6592；來到今年年頭，不少新機都紛紛改用這粒新CPU，U692、K2S就係最新產品。新處理器最大特色係由八顆低功耗Cortex-A7組成，雖然採用低功耗核心，不過由於可以同時八核心全開，因此慳電之餘，效能亦不會輸蝕。小記試玩U692、K2S兩部新機，八核心加上2GB RAM規格下，換頁、開Apps甚至打機都極流暢；再跑Benchmark程式，分別都獲得逾23,000分，直逼大廠嘅高階四核心機款，表現相當唔錯。

大芒睇片夠爽

一如大部分國產手機，U692、K2S都備有超大屏幕，前者搭載6.5吋屏幕，尺寸夠大，可惜解像度就僅得1,280×720，細睇圖示、文字都略嫌未夠紮實；而後者屏幕雖然「縮水」至5.5吋，不過解像度就高達1,920×1,080，圖片邊角明顯銳利得多。純粹睇片的話，兩機表現都合格，睇戲、煲劇絕對夠用！

外形設計輸蝕

雖然機能唔錯，不過講到外形，兩機都令人失望。皆因U692、K2S機身設計都甚有Galaxy Note 2、S4之影子，特色欠奉；幸好機身造功不俗，邊位唔順滑唔鎅手，手感都算唔錯。系統方面，兩機都預載Android 4.2作業系統，K2S介面與公版Android相近，勝在簡單易用；而U692介面就有心思得多，狀態欄、功能表選單、圖示都重新設計過，操作大同小異，加上新鮮感十足，確實抵讚。