《真．三一萬能俠：世界最後之日》OVA除咗帶挈真．三一人氣爆燈，喺動畫初段登場、由元祖駕駛員流龍馬操控嘅三一萬能俠1號「Black Getter」，同樣搶盡風頭。劇中機體披上破舊斗篷，手執雙斧獨力抵抗異形怪物「Invader」，作為地球嘅神秘守護神，一出場型到冇朋友！可惜Black Getter嘅玩具唔多，稍為有啲睇頭嘅，只有完成度不足嘅「新世紀合金」版本，直至千值練喺去年動漫節首展合金版本，隨即掀起話題，依家大貨終於上架，三一粉絲可以圓夢了！

千值練Black Getter
售價：$750

鐵面罩嘅雕工及塗裝都相當細緻，可惜膠製頸巾跟布料斗篷格格不入。

透過換件方式，可以喺拳頭加裝刺錐，重現黑三一繼雙斧以外嘅另一殺着。

隨盒嘅武器Parts唔多，尤幸本身設計出色，加埋造型手掌尚算充足，可以輕易擺到夠氣勢嘅甫士。

胸甲嘅透明綠色位置，採用分件表達，以便向外拉出，配合唔同嘅舉臂甫士之用。

斗篷末端嘅爛位恰到好處，仲有硝煙舊化效果，正！

肚臍嘅三一射線發射口以拆件形式呈現，可惜欠咗特效發射組件。

左手嘅臂刀造型相當銳利，美中不足係不設關節調整角度。

Robot魂 RGM-79SP GM SniperⅡ

Robot魂 MS-07 B-3 Gouf Custom

配色充滿神髓

Black Getter雖然以「黑」為名，但並非全身烏卒卒，根據動畫設定，機體塗裝應該係介乎於炭黑跟炭灰色之間。之前「新世紀合金」版本亦都有圖為證，可惜實物配色略嫌鮮艷，而且刻線細節同陰影都誇張咗，弄巧反拙。反觀千值練版本選擇咗啞色塗裝，腰帶、手腳關節等就用鈦金色，加埋有光澤感嘅銀色臂刀，營造金屬質感。至於鐵面罩遮掩面部嘅設計更係一絕，暗啞而精準嘅眼神着色，忠實呈現黑三一應有嘅孤高傲氣。

斗篷Look做足舊化

傲氣唔只講求眼神銳利，外觀配搭同樣重要。雖然千值練黑三一只係略高於「B記」嘅一般SR合金，不過前者嘅水桶腰，加埋麒麟臂及甲組腳，賣相顯得更有噸位。廠方仲特別採用布料製作斗篷，邊緣位置內藏鐵線，方便玩家扭出心水嘅飄逸造型，加上溶溶爛爛嘅剪裁，更顯黑三一久經戰場嘅滄桑感。作為廠方首款合金作品，黑三一嘅含金量唔算少，主體、下身都以金屬之主，即使一對戰斧只係塑膠製品，但係都做足金屬塗裝，遠觀真係呃到人。

復刻預告：聯邦+自護 四月重返Robot魂

對於鍾意高達，又冇時間砌模型嘅粉絲而言，全組裝、全上色嘅Robot魂系列正好投其所好，而且造型以至可動性都有一定水準，價位又比超合金或Metal Build系列划算得多，唔怪得有唔少高達玩家都力追呢個系列。如果你之前買漏咗《0080》版本嘅RGM-79SP GM SniperⅡ，以及喺《08小隊》登場嘅MS-07 B-3 Gouf Custom，今年四月就咪再走寶，事關Bandai剛剛宣布屆時將會重推呢兩款Robot魂，相信價位都會照舊，建議零售價分別為¥2,800及¥3,500。

查詢：2751 9018（熱血童盟）