話咁快就Boxing Day,係咪仲沉醉於派對嘅歡樂中呢?Party過後,不時都有醉貓「斷片」醜態相片或影片流出;唔想畀其他人見到的話,可用韓國新返嘅Pantech Vega Secret Up,皆因此機內置「Secret Mode」,可以將相片、影片甚至指定聯絡人全部隱藏,要用指紋先可以解鎖,夠安全喇啩?

$5,680

機背用上塑膠物料,手感只屬一般。其V-Touch裝置除咗可以當指紋辨識器之外,亦可當滑鼠用。

一如其他韓國手機,跟機有兩粒3,150mAh電池,應該夠用一日。

機面Home鍵內置LED燈,來電、響鬧等情況都會亮起。

原廠Sound Case可以當保護套兼喇叭之用,一物兩用,推薦入手。

「Secret Blind」模式可以用圖案暫時遮住畫面,唔驚被人偷睇。

搭載Qualcomm四核心處理器以及2GB RAM等高階硬件,Benchmark得分自然名列前茅。

用指紋一掃就會解封「Secret Mode」,隱藏咗嘅Apps都會出現於「Secret Apps」頁面。

Secret Mode可以將相簿、錄音、影片、音樂等內容隱藏,超神秘!

Simple Mode嘅圖示會變大兼簡化,比較易上手。

T Mode就會將介面、功能變番做Feature Phone,可以幫用家大幅慳電,電量倒數時必用。

內置Multi-Windows功能,可以將畫面上下分割玩多工作業。

備有多款靚靚頁面,仲有得免費下載更多款式添!

以往Android手機都有《私密圖庫》呢類可以隱藏相片嘅Apps,不過只局限相片同影片。而Vega Secret Up嘅「Secret Mode」之保密功能就全面得多,只要事先入呢個模式作簡單設定,跟手就可以將相簿、錄音、影片、音樂、Apps等內容全部隱藏,用家必須透過機背嘅「V-Touch」認證指紋,先可以將保密資料解封重現。最神秘就係連電話簿入面嘅指定聯絡人嘅電話、短訊等資料都可以隱藏埋,對方來電時淨係會Show電話號碼,真係神不知鬼不覺。

隔絕八卦精

有冇試過搭車時畀隔籬位啲八卦精左(目及)右(目及),避無可避呢?除咗「Secret Mode」之外,此機仲有個「Secret Blind」模式,功能同日系機常見嘅防窺模式相似,只要用兩隻手指喺狀態欄由上至下一拉,圖案就可以遮住局部或者成個畫面,而且仲可更換圖案及調校透明度,咁隔籬位隻八卦精就冇嘢睇喇!

吉盒變喇叭

其實Pantech喺十月尾時先出過部Secret Note,而呢部同系列嘅Secret Up可以話係前者嘅縮水版。圓角窄邊設計似到足,不過屏幕就由5.85吋減至5.6吋;幸好解像度依舊維持1,080p,色水自然,亮度又足,睇片效果非常正。最搞鬼係廠商為Secret Up推出咗個Sound Case機套,外形同一般Flip Cover分別唔大,不過機套背面就有個圓拱位置,擺上任何鞋盒、紙巾盒之類嘅吉盒,就可以將吉盒當音箱咁用,將音量放大,以後Party焚機就唔使帶喇叭,過癮!規格方面亦屬超班貨,有2.3GHz四核心處理器、2GB RAM,運行Android 4.2作業系統,包保順到爆;此外仲支援香港雙頻4G,上網、串流速度都相當爽。

SPEC

制式:GSM、WCDMA、LTE

處理器:Snapdragon 800 2.3GHz四核心

記憶體:2GB RAM、16GB ROM、支援2TB microSD

屏幕:5.6吋LCD(1,920×1,080解像度)

鏡頭:前置210萬像素、後置1,300萬像素

對外連接:藍芽4.0、microUSB、Wi-Fi ac、NFC

電池容積:3,150mAh

作業系統:Android 4.2.2

體積:151.4×76.4×9.5mm

重量:173g