Docomo F-02F過節煲劇王

iPad嘅Retina Display具備2,048×1,536解像度，曾是平板之中嘅靚芒王，不過近來其龍頭地位備受挑戰；繼Samsung同Asus之後，就連日系Docomo都有超高清平板登場，F-02F搭載10.1吋、解像度達2,560×1,600嘅超高清屏幕，細緻度亦勝Retina Display，過節用佢嚟煲劇，視覺享受正爆！

$5,680

隨機附送底座，可以斜斜地座枱睇片。試睇YouTube HD版《哈比人─荒谷魔龍》預告片，暗位層次分明又細緻。

機背備有810萬像素鏡頭，影日常生活照一定夠用。

雖然10.1吋機身相對比較大部，不過機身僅厚8.9mm及只重519g，手持都算舒服。

記憶卡及SIM卡槽設於機側，並有防水蓋保護。

貌似實體Home鍵，實情為指紋辨識器，千祈咪搞錯。

睇日本電視專用嘅天線，可惜喺香港得物無所用。

內置多款主頁介面，屋企人一人揀一個就唔使爭。圖為「Kids Style」介面，小朋友實鍾意。

內置《NX!eco》程式，可以自行調校慳電設定。

虛擬功能鍵旁加設一個屏幕擷取快捷鍵（圈示），Cap Screen後更可即時畫畫、記事。

內置一個簡易版瀏覽器，常用功能擺晒出來，用落好方便。

預載多款字典，不過大部分都係日英互譯。

採用Snapdragon 800處理器，同其他頂級Android機分數相近，效能好強。

超高清大芒

依家全高清屏幕已經成為好多Tablet嘅基本配置，老實講，畫質的確好細緻；不過消費者對靚芒嘅追求永無休止，於是一眾廠商就研發出比全高清解像度更佳嘅超高清屏幕。如新機F-02F嘅10.1吋屏幕解像度正是2,560×1,600，顯示影像無論近睇抑或遠望都好Detail；再加上屏幕採用IPS素材，顏色準確兼且可視角高，配合埋座枱Docking，擺枱面睇劇一流。

指紋轉介面

日本Gadgets多會加入指紋識別器作保安之用，今次F-02F就加入咗新功能，其指紋識別器位於機面右邊，除照舊可以掃指解鎖外，特別在用家可以一次過加入多位用戶嘅指紋設定檔，識別器可憑指紋自動開啟番相關人士嘅自訂頁面。另外，此機內置多個版面主題，例如以卡通為主嘅「Kids Style」以及將介面同Icon簡化晒嘅「Simple Style」，全家人用的話，都可以有各自嘅「Style」。

頂班硬件規格

原來，Docomo今冬及明春，就只得F-02F一款平板電腦產品登場；可能亦因如此，廠方就將現時最強嘅硬件一炮過裝晒落F-02F，包括Qualcomm Snapdragon 800四核心處理器同埋2GB RAM，更內置64GB容量及支援最大64GB記憶卡，擴充力都唔輸蝕！此外，一如其他日系機，F-02F亦支援IPX5/8防水、防塵標準，落水濕身都頂得住。值得一提，佢內置電池容量竟然高達9,600mAh，睇數字已經夠誇，小記實測用3G上網兼唔開Eco慳電模式都可以玩足幾日，咁鬼長氣，夠你平安夜用到Boxing Day！