香港地，買模型的人多，不過真正砌模型者又有多少（素組者除外）？就算閣下OT過後仍未願瞓，而且不受雞汁電視節目以至iPad的誘惑，且在家中不受環境和家人阻礙，盡情開工、噴油者，相信少之又少吧！雖則未能「親力親為」，但透過觀摩高手的作品，總可望梅止渴。本年度香港公開模型大賽的科幻情景組亞軍作品—VF-1S with Fast Pack，最近就在旺角一所模型店內公開展出，水準之高讓人大開眼界之餘，又會否燃起你排除萬難、重拾工具刀和噴油的衝動呢？

由香港比例模型會舉辦的香港公開模型大賽2013之中，輝哥就憑VF-1S with Fast Pack情景作品，成為科幻情景組的亞軍。

機上若干位置用上重金屬塗裝效果，與VF-1S的啞色主調形成鮮明反差。

除了機身上的細節，就連飛機庫內的一事一物都做得一絲不苟，為求像真，輝哥還在地板加上油漬。到底模型製作是兒戲還是藝術，見過實物者，心中自有答案。

機底的輸油管既可加強「臨場感」，並有支撐機身的重要作用。

紙箱是輝哥自行製作，先找到合適的版本，再將之縮印起來，之後以雙面膠紙托底，便可摺得似模似樣。

情景所用的工作人員，來自Tamiya的1/48甲板後勤人員，原模統統戴頭盔，輝哥就將之削去，再自行修改髮型而成。

輝哥表示正在構思一台科幻戰艦模型，作為下屆香港公開模型大賽的參賽作品，大家拭目以待。

現於旺角皆旺商場Star Six Modeling展出的VF-1S with Fast Pack，出自科幻迷輝哥的手筆，從作品水準估計，筆者想當然以為輝哥是資歷頗深的模型人，想不到他的模型年資只有短短七年，並且在2007年首次參賽，便已贏得科幻情景組亞軍，之後在多項比賽中亦成為三甲得主，何解短短時日已有如此深厚功力？輝哥表示：「其實我細細個已經追開模型雜誌，本身又有插畫底子，觀察力算唔錯啩！最重要係我花喺模型嘅時間比一般人多，甚至年初一都留喺Workshop開工。其實砌模型一定要多練習，多嘗試，有啲同好可能覺得自己功力未夠，所以唔敢試新嘢，不過我就不斷試、衰咗再不斷修改。」

兒時科幻情意結

自2007年起，輝哥便多次參賽，何解今次會選擇《超時空要塞》（Macross）的VF-1S為題材呢？輝哥透露：「我細細個已經係Macross嘅粉絲，當中嘅卡通場面，好自然令人聯想到美軍航空母艦，所以今次連飛機庫都做埋出嚟，模擬出戰機維修時嘅狀況。飛機主體用長谷川（Hasegawa）嘅1/48 VF-1S輕裝版，本身嘅線條已經好靚、Detail位好足，Fast Pack就用咗Club M所出嘅手辦組件，要將呢兩間廠嘅作品組合起嚟，都搞咗好多工夫去就位。由構思到完成，需時兩個月，每日花兩至三個鐘。」

輸油管大有文章

近年來，模型界都流行重金屬感的塗裝風格，這次的VF-1S也不例外，尤其是機背上Booster嘅前半段，以及最尾的大型噴嘴，都有幾可亂真的效果，輝哥在訪問中不吝嗇賜教：「最重要係先噴『光澤黑』做底色，如果想再加強光澤感嘅話，甚至可噴多一層厚『力架』，之後先噴金屬色。因為呢部VF-1S好似真戰機，表面唔會有太多光澤位，為咗想有反差效果，所以我喺若干位置用咗重金屬塗裝，以免成部機都消光咁單調。」另一方面，機身底部插上了輸油管，除可加強像真度，原來另有玄機，輝哥指出：「長谷川嘅三支機身起落架原件，都係塑膠製成，唔多受力，我又喺機背加咗Booster，時間耐咗，啲起落架會好易孿，所以我喺機底加咗輸油管，管內藏有銅枝，由佢支撐咗大部分重量。」據輝哥表示，這台作品的公開展出期約半年，無論是模型迷或Macross的超級粉絲要把握時間了。

facebook專頁：www.facebook.com/STARSIXMODELING