豪鬼（Gouki，歐美版稱Akuma），單純為戰鬥而生嘅修羅惡鬼，招式強橫霸道，仲要弒師殺兄，無論人物性格或者角色背景，都擺明係《Street Fighter》當中嘅大奸角。不過呢隻惡鬼偏偏愈奸愈紅，不單登場之後差唔多集集有佢份，仲有唔少玩具廠為佢打造可動Figure，今次輪到本地薑Kidslogic出手，以兩年時間將佢徹底1/6化，頭雕、素體到道袍都誠意十足，而且只售$1,000，擁躉注定畀佢一招KO！

零售價︰$1,000
推出日期︰明年第二至三季

全物關節鬆緊度適中，輕易就可擺到「滅殺豪昇龍」嘅必殺技甫士。

Body採用1/6比例，高30cm，名副其實高人一等。

拆開頭髮就見到LED機關，撳着雙眼就會發出紅光，殺氣逼人！

腳腕關節可以360°轉動，草鞋仲除得到，變成赤腳Look。

麒麟臂嘅線條夠晒澎湃，而且手肘用咗雙關節，可動性高。

道袍跟番原設計，專登整到皺皺爛爛，腰帶仲真係用麻繩造o架，夠誠意。

隨盒附有握拳、開掌兩款造型手掌，實測發現Ball-joint位唔算實都好易換。

Kidslogic近年表現積極，由Q版聖鬥士到Ironman系列，反應都叫好叫座，無形中幫佢哋打咗支強心針，今次嘅豪鬼就係品牌嘅1/6 Figure新嘗試，業務經理James表示︰「有打開機嘅男生，相信冇人未打過《街霸》，我哋老闆都係Fans，將當中角色玩具化，係佢多年嚟嘅夢想。難得Capcom今次畀我哋好大自由度，我哋都考慮過好多個製作方案，最後覺得1/6 Figure最能夠表現角色氣勢。首階段會先出豪鬼，明年動漫節出埋阿隆同阿Ken，等大家組成《街霸》鐵三角。」

爆肌感覺出晒嚟

灰版嘅豪鬼早於兩年前嘅動漫節已經現身，何解拖到依家先成事收訂？James馬上解畫︰「豪鬼喺遊戲中係好大隻，但係依樣畫葫蘆，將2D畫面變成3D Figure嘅話，就會嚴重影響靈活性，為咗攞個平衡位，個Body我哋都修改咗好多次，而且調校埋關節鬆緊度先敢出街。」就試辦所見，呢兩年係值得等嘅，由原型師Xan操刀嘅素體，高30cm，比一般1/6 Figure高得多，分外有氣勢，而且全身充滿肌肉感、青筋盡現，十足遊戲中嘅爆肌感覺。留意胸腹之間係包膠製成，令雙臂猶如真人般，可以自然地向內靠攏，配合全身20多個關節，靈活性不遜於「PLAY ARTS改」出過嘅豪鬼Figure，可以傳神擺到「滅殺豪波動」嘅甫士。

膚色塗裝有待改善

頭雕上色方面就由ChildDream Work嘅Bob Yu負責，可能因為豪鬼輪廓深，所以神似度相當高，廠商仲將擅長嘅LED Gimmick，加入豪鬼嘅頭內，撳一撳腦後嘅機關，雙眼就會發出紅光，夠晒殺氣！另一方面，網上有唔少「爸打」批評道袍太窄，但係James認為《街霸Ⅳ》嘅豪鬼造型的確如此，而且特登喺邊位加入鐵線，造出隨風飄逸嘅感覺。不過就試辦所見，筆者都覺得仲差啲喎，例如得兩對造型手掌實在太少、肘位關節外露太突兀、道袍又冇天字花紋，最大問題係Body未做消光，就似NECA嘅玩具般「膠味」太重，好彩廠方拍心口話會重新塗裝，出貨時皮膚色澤會變返暗啞，務求做到Human-being，咁就一於拭目以待！

＊圖中為試辦款式，與正式推出的版本或有若干分別。

查詢︰2751 9018（Kidslogic）