率先實測 G Flex屈機唔易爆

手機未出現前，電話手柄大都採用彎曲設計，好揸手又貼面，煲粥不知幾舒服。惟手機卻受屏幕所限，非變成平面方角不可，手感未必佳之餘，望落仲一式一樣。LG G Flex與別不同之處，在於它的6吋巨芒向內屈曲，機身跟隨微彎，外形破格之餘，仲勁好手感兼睇片視野佳。此機韓版水貨日前到港，小記率先實測，又睇吓佢值唔值七千幾銀先！

G Flex $7,680

移植了G2的機背按鍵，用食指就可開機及調校音量。

官方稱機背物料懂得自我修復，小記以指甲猛刮，花痕果真自動消失，勁高科技！

一體成型設計，SIM卡槽要拮開，麻煩咗啲。

跟HTC One Max（上）比較，Flex播片時明顯較易聚焦，視野亦更廣，美中不足係顏色有點偏藍。

內置Flex轉頁效果，頁面會彎彎地轉動，同機身襯到絕。

機身要大大力先壓得平，證明幾受力喎！

曲面機身放喺後褲袋都好舒服。

可設定機面四粒觸控鍵的排列及用途，好細心！

提供單手模式，撥號介面會縮細，方便按鍵。

可同時開啟兩個QSlide Apps，實現多工作業。

《Q Memo》讓用戶隨時擷圖記事，並有不同顏色及筆頭選擇。

彎曲屏幕極度受壓

曲面手機唔係新鮮事，早一個月前才有部Samsung Galaxy Round到港。LG G Flex現在才推出，雖然輸了時間，但設計卻更勝一籌。首先，它跟由左至右曲的Round不同，它是由上至下曲，頂部及底部向中心微彎24度，由於弧面更大更闊，因此實際上彎好多，放喺枱面直頭可當搖搖板咁玩，就知有幾誇張！誇張嘅仲有電池都是彎曲設計，並可配合機身一同受力變平，小記一個大男人都要出盡力先壓得平，難怪官方指它的受壓能力高達40kg啦！

睇片聚焦視野更廣

手機變彎，最大好處當然是機身夠貼手同貼面，但其實睇片一樣有好處。當手機橫置時，屏幕就如現在的曲面電視一樣，可令眼睛更容易聚焦到屏幕中央，同時由於左中右畫面跟眼睛距離相同，因此視野會比平芒更闊，兼更具臨場感。小記以「少時」MV試片，就有如此感覺，唯一美中不足是解像度得720p，P-OLED面板又有點偏藍，令畫質略為扣分。

強橫硬件預載繁中

坐擁大芒，操作難免要雙手並用。廠商照顧周到，因此從同門G2裏把機背按鍵移植到G Flex上，用戶手持時只需用食指，便可開關機兼調校音量；配合機內的「單手模式」，更可單手撥號，方便非常！硬件亦如G2倒模，有2.26GHz四核心處理器、2GB RAM及32GB內存，開Apps及多工處理都保持流暢，Benchmark更完勝Note 3，賣咁貴都抵番晒！特別一提，此機雖為水貨，但已預載了繁中介面，並對應本地4G，保證上網唔會窒吓窒吓！