智能手機耗電量愈來愈勁，坊間有一大籮慳電偏方，好似校暗個芒、熄數據等等；而日本仔就話你知慳電原來唔使咁麻煩，一個IGZO芒就搞得掂！日系新作AQUOS PHONE ZETA SH-01F嘅賣點就係其5吋IGZO屏幕比傳統芒慳電得多，廠商仲話3,000mAh嘅電池容量可以用足三日，論長氣都可算係手機界中嘅長跑好手！

$4,880
雖然有個5吋大芒，不過邊框都算幼，手持時都算就手。

記憶卡、SIM卡槽都位於機頂，全有防水蓋作保護。

音量鍵由機側實體鍵轉為機面左下角的輕觸鍵。

拍埋以靚芒見稱嘅LG G2（右）一睇，G2色彩較濃，SH-01F亮度相對較好，顯示風格各有不同。

1,630萬像素鏡頭，對焦速度、成像都不俗；其一體式機身冇得換電，幸好電量夠撐。

採用Docomo LIVE UX，功能表以分割式顯示。

內置Energy Save模式，可以調校屏幕亮度、顯示模式等，令手機更慳電。

介面右下方嘅Recent Apps，除會顯示最近用過嘅程式外，亦提供Mini Apps小視窗。

原生瀏覽器支援懸浮操控，將手指於屏幕上2至3mm凌空及停留就會放大網頁或移動頁面。

試跑Benchmark，得分與一眾旗艦機相若，機能不俗。

試相
日光下拍攝，色水自然兼接近實物，沿邊嘅細節位亦相當銳利。

內置Grip Sensor，如圖中咁樣手持機身，就會自動着芒，非常實用。

$4,880

超慳電屏幕

Sharp研發多年嘅IGZO屏幕向來主打慳電，來到SH-01F，屏幕技術又有新突破。據廠商表示，此機嘅5吋屏幕顯示動態及靜態畫面時，耗電量分別比上代屏幕少50%及90%，手機整體電量自然襟用得多。小記實測，開住3G上網、睇YouTube兼影相玩足大半日，再待機超過十小時，3,000mAh電量竟然仲剩番46%，確係堅。雖然未必做到廠商所講用足三日，不過依然比一般智能手機長氣得多，有佢就唔使外置充電器跟身。

手握即着芒

新芒慳電之同時亦無犧牲顯示質素，屏幕具1,920×1,080解像度、440ppi像素密度，可視角度、亮度、細緻度夠高，拍埋同樣以靚芒做賣點嘅LG G2，色水同對比度亦相當接近，睇得舒服！美中不足就係外形相對沉實，黑色機面兼圓角番梘設計賣相一般，紅、白、藍配色亦略嫌大路；較驚喜反而係機側加入名為「Grip Sensor」感應器，將手機平放時，屏幕就會緩緩關閉，用手掌握緊機身時，屏幕又會自動着起；來電時握機仲可以將鈴聲音量立即變細，用落都幾方便。

NightCatch夜攝

講到日系手機嘅強項，又點少得攝影呢？佢搭載1,630萬像素鏡頭，光圈升級至F1.9，影相時散景更加明顯；最特別就係引入NightCatch模式，於超暗環境下可以有效提高相片亮度之餘，亦唔會令成像雜訊過多，影夜景就最啱。機能方面也屬旗艦級，2.2GHz四核心處理器，2GB RAM，並支援最大64GB記憶卡擴充容量；另同時支援日系機常見嘅IPX5/7防水標準，而耳機及microUSB充電插口則不設保護蓋，成日聽歌、充電就唔使開開閂閂咁麻煩。

SPEC

制式：GSM四頻、UMTS

處理器：2.2GHz四核心

記憶體：2GB RAM、32GB內存、支援64GB microSD

屏幕：5吋IGZO（1,920×1,080解像度）

鏡頭：後置1,630萬像素、前置210萬像素

對外連接：HSDPA、802.11ac、microUSB、藍芽4.0、IPX5/7防水標準

電池容量：3,000mAh

作業系統：Android 4.2

體積：141×70×8.9mm

重量：139g

同場加映：日系Z1 容量打孖上

同場仲有另一日系機SO-01F登場，其實即係Sony Xperia Z1。水、行貨基本規格相同，包括全高清5吋屏幕、2.2GHz四核心處理器、2,000萬像素鏡頭等等，最大分別是水貨版本容量由行貨嘅16GB大幅提升至32GB。另外，此機亦是首部支援香港4G制式嘅日系水貨機，不過暫時只支援1,800MHz頻譜。

查詢：2374 0618