高清G Pad 8.3 輕身搶閘

早幾日iPad兩連發，不過新機要11月先陸續有售，反而另一陣營LG嘅平板新品就已經搶閘賣街，佢就係G Pad 8.3。此機配備8.3吋Full HD大芒，而且仲用上四核心處理器，規格不俗；最正係僅重338g，輕過iPad Air、同Retina版iPad mini不遑多讓。再睇埋價錢，竟然二千七蚊有找，牌面筍過對家。

G Pad 8.3 $2,698

手機有來電時，G Pad 8.3會一齊響，大家可以喺平板Cut線，不過就唔可以用平板聽電話。

支援Knock On功能，用手指敲兩敲屏幕就會着芒。

厚度只有8.3mm，薄身易拎。

機頂位置設有microSD卡槽，可插入64GB卡。

機背採用金屬物料，手感不俗。

採用與G2相若嘅介面，支援最多七版主頁。

《筆記本》可以畀大家發揮創意，任你亂畫！

Android 4.0或以上嘅手機都可以裝到《QPair》，不過被連接對象暫時就只有G Pad 8.3。

《QPair》有一系列同步提示功能，用家亦可以自訂開關此等提示功能。

內置《Q Remote》，可以將平板變身家電遙控。

虛擬觸控按鍵可以互換排位，迎合大眾使用習慣。

於畫面上用三隻手指由右向左橫掃就可以將執行中嘅畫面儲存，由左向右掃就可以切換原來畫面。

試片
試播YouTube的《盜海狙擊》高清預告片，屏幕顯示銳利，機底雙喇叭音質都唔錯。

1g、Wi-Fi Cellular版341g）相差冇幾，超便攜；加上機身用咗圓邊設計，拎機時唔會頂手！

338g夠輕身

其實幾年前LG推出過平板產品Optimus Pad，可惜當時冇引入香港。今次G Pad 8.3終於有行貨，驟眼睇機面激似同廠手機G2，同樣係圓角設計兼冇機面實體鍵，都算簡約靚仔。其8.3吋屏幕用上IPS素材，解像度達1,920×1,200全高清級數，睇相、睇高清影片，飽和度、亮度都啱啱好，冇偏色兼睇得舒服。最抵讚就係機身僅重338g，同出名輕巧Retina版iPad Mini（Wi-Fi版331g、Wi-Fi Cellular版341g）相差冇幾，超便攜；加上機身用咗圓邊設計，拎機時唔會頂手！

手機SMS經平板覆

系統方面，此機沿用Android 4.2作業系統，介面則與G2等新機相若，好似多工視窗《QSlide》、畫畫《QMemo》都有齊。最特別是引入新功能《QPair》，只要分別喺G Pad 8.3及其他Android 4.0或以上嘅手機安裝《QPair》程式，再進行兩機配對，之後手機每逢有來電及SMS時，平板都會同步響起。用家仲可以用平板Cut線或覆SMS，直接又方便！另外，除提供Facebook、WhatsApp等社交程式同步提示之外，亦備有名為「Internet via Phone」功能，其效用與手機熱點相同，不過《QPair》就自動設定好密碼及直接連線，唔使慢慢設定咁麻煩。

性價比高又長氣

講到規格，G Pad 8.3都唔輸蝕，佢內置1.7GHz四核心處理器以及2GB RAM，換頁、過場效果都好流暢；而且機身亦支援64GB記憶卡，最適合擺大量高清影片同劇集！另外仲內置4,600mAh超大容量電池，玩足一日應該不成問題。最驚喜就係定價，16GB Wi-Fi版Retina iPad Mini開價$3,088，而屏幕更大嘅G Pad 8.3就$2,700有找，抵買程度直逼賣$2,398嘅新Nexus 7，相信可以吸到部分iPad Mini嘅游離買家。