最強新女聲J.Arie 試彈《Rocksmith 2014》

音樂遊戲相當多，但可以用真樂器玩的，《Rocksmith》應該只此一家，難怪之前喺外國咁受歡迎！今日推出嘅第二代最新版本《Rocksmith 2014》，收錄50首唔同年代歌曲之外，仲新增「樂團模式」（Session Mode），可以同電腦虛擬樂隊一齊Jam歌。筆者搵來識彈結他嘅樂壇新人J.Arie試玩，雖然玩遊戲同平日彈結他稍有不同，不過J.Arie適應之後都邊玩邊讚！

J.Arie

《Rocksmith 2014》中有好多模式任你揀，新丁或高手都能循序漸進，玩得盡興。

遊戲製作都幾認真，玩之前需要將每條弦調好音。

結他或低音結他的Jack線插口可連上專屬接線，接上遊戲機，便可將樂器當手掣使用。

初學都唔怕，每首歌之前都有真人Video教你點彈。

呢個迷你遊戲「Gone Walin'」逗得J.Arie好開心。

迷你遊戲入面仲有打喪屍玩，似足《Typing of the Dead》。

在「樂團模式」中無論彈成點，背後的虛擬團隊都會努力幫你，咁好的隊友邊度搵吖！

J.Arie

插真結他即玩

J.Arie上月推出收錄七首歌的EP《Soliloquy》，賣碟過三千張，以新人來說成績已很不俗。筆者都好Buy佢識玩樂器之餘，把聲亦好有個性，最鍾意佢首《大個》，而J.Arie自己就鍾意《Make It Last》多啲。J.Arie個人較喜歡玩Acoustic，不過今集《Rocksmith 2014》所收錄嘅歌曲多屬Rock，最後揀咗首70年代Bob Dylan《Knockin'On Heaven's Door》，算係比較「靜」的歌曲。

《Rocksmith 2014》隨遊戲跟上一條獨家音源連接線，只要插入結他或低音結他Jack線插頭就即可玩；不過正式開始彈奏之前，遊戲會引領玩家為每條弦調好音，Tune好先開始玩。

虛擬夾Band有趣

進入演奏模式時，對於初次玩《Rocksmith》嘅J.Arie嚟講真係有少少難度，因為音符從畫面跌到指定位置時就要彈，跟睇住樂譜彈係兩回事，摸索咗一陣終於都掌握到當中竅門。每首歌都有難度調校，最初只玩「難度0」最低難度時，真係好易就能彈中音符；不過當調高難度後，指法就複雜好多，就連J.Arie都開始有啲手忙腳亂！

其實唔一定要好叻彈結他先可以玩，如筆者呢類「音樂低能」，都可以從每首歌的真人教學模式學習相對的指法及每首歌的巧妙位，實行邊玩邊學！《Rocksmith 2014》其中一個特別功能係「樂團模式」（Session Mode），可以自訂四組唔同樂器跟玩家支結他Jam歌，J.Arie揀咗兩組Drum、Keyboard同Bass伴奏，呢隊虛擬樂團會根據玩家Free Play彈奏時的曲風而自行配合，J.Arie試完都讚幾有趣！

玩Mini Game最興奮

除咗正常音樂玩法，點都要加入少少遊戲元素吸引非Band友玩家，所以收錄了「Guitarcade」迷你遊戲模式，要用結他作為手掣，完成各個小遊戲。筆者事先聲明，這個迷你遊戲模式有少許「低B」，但幸好是J.Arie反而玩得最開心；如《Gone Walin'》遊戲要掃Chord控制鯨魚噴水取金幣，會因應掃Chord的時間同力度調整噴水時間同強度，原來都唔容易玩。講番《Rocksmith 2014》所錄的50首歌曲中，都有好多響噹噹名字，如Kiss《Rock and Roll All Nite》、Nirvana《Heart Shaped Box》、Queen《We Are The Champions》同Radiohead《Paranoid Android》等等，如果有買第一集的話，更可將原本的歌曲轉移到新版本上彈奏。