玩具迷都知古天樂喺火炭有個成萬呎嘅私人玩具博物館，「葡萄」亦係人之常情，至於Hot Toys掌門人Howard Chan最近喺信和開設嘅Secret Base，直頭令大家超級「葡萄」。雖則喺Howard口中，新舖係主要用嚟疏導訂購人龍，不過超科幻化嘅裝潢加上目不暇給嘅絕版珍藏，似博物館多過玩具舖，簡直係Kidult嘅天堂！

仲未有發售日期及售價嘅HT 1/12 The Bat，就有實物進駐店內，畀Batman粉絲先睹為快。

早前喺希慎廣場及香港動漫節展出、令人嘆為觀止嘅Iron Man Hologram，依家都可以去Secret Base睇到。

新店仲展出埋《The Avengers》嘅演員簽名，有錢都買唔到。

HT自家改造嘅透明版Iron Man，當然係非賣品，嚟Secret Base先有得睇。

除咗HT作品，店內仲展出唔少Howard嘅私人收藏，題材當然係佢最鍾意嘅Batman、Alien及Star Wars等等。

HT MMS215 《Iron Man 3》 1/6 Igor
零售價：$3,280　預訂價：$3,230

新店設有六大電影主題展區，包括食正Super Hero熱潮嘅DC Comics（上）及Marvel。

做生意之餘，Secret Base亦恍如個人以至品牌嘅珍藏館，Howard就視之為對HT發展嘅一種肯定。

位於旺角信和中心20樓全層嘅Secret Base，今日正式開幕，未計貨倉，只係門市面積已經超過3,000呎，雖然唔似古天樂個萬呎玩具倉咁誇張，不過已經比舊舖Toy Hunters大咗好多倍，最緊要係公開開放，正如Howard所講：「就算你嚟到唔買嘢，純粹參觀都會好開心！」未入店內，入口嘅自動門已經令人Suprise，設計似足太空船嘅閘門，店內布置就更加超現實，以灰、黑雙色為主，仲有燈位、櫥窗用咗六角形設計，絕對係全港最破格嘅玩具店，Howard再度解畫：「我哋設計新舖時，好想畀到人科幻、Fantastic嘅感覺，猶如置身喺《Alien》、《Prometheus》嘅太空船之內。」

六大電影主題區

至於展品方面，就以HT嘅作品為主，唔只新品，仲有已經絕版、市面上難得一見嘅歷年作品，加埋Howard本人嘅珍藏，例如Iron Man嘅1/1胸像、Predator嘅1/1頭盔，以及Star Wars情景等，陣容龐大之餘，而且分門別類放入Marvel、DC Comics、Star Wars、Alien、Predator及Terminator六大主題展區之中，令參觀者欣賞Figure之餘，仲可以投入相關嘅電影世界觀之中。Howard表示：「Hot Toys都成立咗13年，其間我哋做咗好多作品，我一直都好想搵地方Show番晒出嚟，畀自己同粉絲一個回顧，就算你玩Figure冇耐，嚟到都可以認識番我哋以前嘅作品；其實場內大部分展品已經絕版，我都交帶咗同事，如果有粉絲問價，只好同佢講係非賣品。雖然新舖大好多，但實情仲有好多作品、珍藏放唔落，加上未來仲有好多大Project，或者將來會將展品換季展出都未定。」

開新舖疏導人龍

除咗與眾同樂，開設Secret Base仲有一個重要任務，就係疏導訂購人龍，Howard就喺開幕禮上道出原委：「無論訂貨或者攞貨嘅人龍都愈嚟愈長，但係位於兆萬中心嘅Toy Hunters又擴張極有限，所以一年前已經構思開新舖，地方一定要大，先可以容納到更多粉絲。定位方面，Secret Base主力做HT嘅商品，收訂、派貨，Toy Hunters就做其他品牌商品嘅門市生意，如果連Secret Base都爆滿嘅話，到時Toy Hunters亦都可以幫手收訂，互相支援，加上近年嚟我哋實行網上登記及分流做法，相信唔使再要粉絲排餐死。」但願承Howard所言，各位玩具迷以後買嘢都可以開開心心冇勞氣啦！

預訂Igor有Take Two

之前講過HT嘅Igor已經喺指定日子開訂，錯過咗，點算好？唔使擔心，Secret Base畀多次機會你，於本周四起亦可親臨預訂，Iron Man粉絲咪再錯過，銷售詳情可到Toy Hunters嘅facebook專頁瀏覽。

Hot Toys Secret Base

地址：旺角彌敦道信和中心20樓

facebook專頁：www.facebook.com/ hottoyssecretbase

查詢：3722 3988