仍然沉迷玩《GTA V》作奸犯科？不如轉吓口味，跟荷里活紅星感受長達15年的個人「靈異」經歷啦！這套由兩位明星Ellen Page同Willem Dafoe合力「攝製」的遊戲《Beyond：Two Souls》，雖然製作費拍馬都追唔上《GTA V》，不過製作非常認真，微細到角色皺一皺眉頭、戚一戚眼角都呈現得到，遊戲過程中仲可感受到Ellen Page同纏住佢十幾年的「靈體」艾登（Aiden）的感人故事，玩完隨時會爆喊！

《Beyond：Two Souls》

除送四部製作影片、額外30分鐘可玩劇情外，再送印刷精美的珍藏版精裝書，真心Fans就不妨花多少少買套導演豪華版吧！

早前遊戲開發公司Quantic Dream CEO David Cage（中）特地來港宣傳做勢。

祖迪在8歲時被驗出擁有超能力，其實是附身的「靈體」艾登作祟。

製作小組睇中Ellen Page其一原因是她從小就有演出經驗，要塑造8歲祖迪容貌都無太大難度。

祖迪在這幕「Homeless」中為接生及救被困火海的流浪漢朋友而被打得半死。

女星Ellen Page為「拍攝」遊戲，全身黐了感應球足足拍了幾星期才成事。

此遊戲可感受到祖迪對艾登既相生又排斥之情，戲劇效果一流。

廿多個結局任你玩

要玩完成隻《Beyond：Two Souls》並唔係咁易，遊戲當中有好多分岔點，揀選唔同路線都會引伸唔同劇情，總計有成廿幾款結局。如遊戲有段火車追捕場景，玩家控制「靈體」艾登叫醒Ellen Page扮演的角色祖迪（Jodie），就會進入火車大逃亡路線；若趕唔切叫醒祖迪的話，祖迪就會被警察逮捕。但有時唔同選擇未必會即時引領出不同分岔路，要過一段時間先會產生變化，而且遊戲並不會特別作出相關提示，所以要玩畢廿幾個不同結局都幾難，所花時間亦會比正常十小時遊戲時間多好多。

電影製作明星拍攝

本作玩多重結局，製作手法極富電影感，其實都幾似同公司的姊妹遊戲《Heavy Rain》。今次更吸收上次經驗，由遊戲架構、系統同操作手法都有所改進，譬如採取插敍手法交代故事推進，又減少了QTE即時反應事件，改用更直覺的操控方式提升操作經驗。《Heavy Rain》是四個角色在四天裏的故事，《Beyond：Two Souls》就講祖迪由8歲到25歲的事情，而差不多全部演出都經由「演出擷取」（Performance Capture）系統製作，Ellen Page、Willem Dafoe及參與的演員都在身上及面部黐上多個感應球擷取肢體動作同表情，令遊戲角色栩栩如生，更同時收埋音，真係似拍電影多過似製作遊戲。

靈體穿牆隔空取物

《Beyond：Two Souls》最有趣元素是加入「靈體」艾登角色，可以憑佢做出偷窺、穿牆同隔空取物等動作，只要在操控祖迪時按下「△」按鈕即可改為操控艾登，但行動範圍不能離開祖迪太遠，而且如要上其他角色身時，亦要視乎該角色的定力夠唔夠。至於操控艾登都唔算複雜，只要稍為學習就能操控自如。整個故事都建構在超自然的背景上，某些場景下祖迪還要透過讀心術，從屍體中讀取「他們」的記憶。另一亮點是遊戲所營造的光源效果十分出色，遊戲中不同質地物件在光源下都有唔同的反光效果，同時皮膚同眼睛着色處理都好像真，祖迪面上的雀斑都清晰易見。不過要彈遊戲雖支援雙人模式，但要兩人分開操作祖迪或艾登，同一時間亦只能操作一個角色，跟單人模式其實無大分別。

INFO

類型：互動戲劇

開發：Quantic Dream

平台：PS3

推出日期：今天

售價：$388（普通版）$588（導演豪華版）

查詢：2341 2356