Sony、Samsung 電話落錶

呢排手機鬥得火熱，如要吸引用家換機，單靠手機規格未必夠，就連配件都要有Gimmick至有得傾。就好似Samsung同Sony最近就分別推出Galaxy Gear及SmartWatch 2，不約而同採用手錶形設計，戴佢上手當係電子錶固然得，如果連接手機，更可以打電話、覆SMS同埋影相添！

Sony SmartWatch 2 $1,698（a）（黑鋼錶帶版本售$1,998）（左）、Samsung Galaxy Gear $2,498（b）

SmartWatch 2有撥號介面，不過只能作遙距控制之用，傾電話仍要攞手機。

如想整理手錶內的Apps，便要下載《SmartWatch 2》程式；而Google Play內亦有官方專用Apps供下載。

採用3×2圖示介面，清晰易用。

圓形金屬開關鍵設計似足Xperia Z等同廠手機，襯埋一套就至啱。

側面設有microUSB接口，一插即充電。

24mm標準錶帶，鮮色矽膠撞黑色錶面都唔錯。

要裝上專用保護殼方可充電，略嫌不便。

錶扣位置其實係喇叭，音量都夠響。

支援S Voice，可以玩語音控制撥號及發送SMS。

可以喺Gear隨時撥號兼用免提傾電話。

錶帶另一邊有個鏡頭，影相時一定有快門聲，冇得熄。

Samsung Apps內備有多款唔同類型專屬Apps下載，超實用。

Sony SmartWatch 2 NFC一拍配對

Sony SmartWatch已經出到第二代，今次錶身設計同上代好似，不過錶面改用四方形，而且備有1.6吋篤芒；最正就係其24mm標準錶帶可以替換，原裝矽膠帶已經有粉紅、螢光等顏色，撞色搶眼；此外亦可揀黑鋼錶帶。至於配對方法非常簡單，同NFC手機一拍就成功配對，唔使用藍芽慢慢Pair！

而只要將Sony SmartWatch 2連接手機，就有大把功能可以配合手機用到；其中包括遙控撥號、遙控拍照、查閱短訊，甚至連Gmail、Facebook、Twitter嘅簡單訊息都可以用SmartWatch 2閱讀。小記最鍾意就係錶身支援震動功能，有來電、訊息時識得震一震提提你，Miss Call機率大減。值得一提，SmartWatch 2符合IP57防水標準，落雨唔怕淋壞，再配合埋指南針、倒數計時器及計時器等功能，戶外用都冇有怕。

SPEC

屏幕：1.6吋LCD（220×176解像度）

對外連接：藍芽3.0、microUSB、NFC

使用時間：3至4天

體積︰42×41×9mm

重量︰122.5g

Samsung Galaxy Gear 免提煲粥鬼祟影相

Galaxy Gear機面有個1.64吋正方形篤芒，一般情況下會顯示時鐘、日期等資料；而錶帶位置則設有喇叭、收音咪及凸出鏡頭，只要用藍芽將Gear同Note 3等手機連接，就可以用Gear免提撥號或接電話，連手機都唔使拎上手！而錶帶上鏡頭雖然的骰，不過就可以拍攝出190萬像素照片，只要喺拍攝介面篤一篤芒便可影相，Snap超方便；影完相仲可以即刻傳輸落手機，隨時Share畀朋友都冇問題。

除電話及拍攝功能外，用家亦可以用Gear查閱手機短訊、遙距控制手機播歌又或者當計步器之用。若嫌功能唔啱使，仲可用手機嘅《Gear Manager》程式，登入Samsung Apps下載其他Gear專屬Apps，入面有多款時鐘款式之外，亦有《Line》、《Kakao Talk》等即時通訊Apps，可以即時用此錶回覆訊息；另外亦內置大量包括《MyFitnessPal》、《Runtastic》等運動Apps，運動迷實啱！雖然Gear剛剛推出，但粗略估計已有近60個Apps可以免費下載。