拍住S-Max 賞月方便晒

再過幾日就係農曆八月十五中秋節，賞月嘅好時機是也。無論係約另一半過二人世界，或者搵齊成班friend去玩，如果有架車幫手，上山頂睇月光就方便晒啦！筆者就事先演習一番，搵嚟靚靚模特兒不特止，仲有福特（Ford）S-Max傍住，到新娘潭遊車河、圍爐BBQ兼賞月，就算未到中秋正日，氣氛都正到冇得彈！

沿住新娘潭一帶有唔少泊車位，不過每逢假日都好搶手，唔想等位就要早啲到。

魚塘裏面魚種繁多，包括紅鮪、黃鱲(魚倉)及星鱸等，最啱即釣即燒，收費方面，日釣每位$160/位，夜釣就盛惠$180。

中秋夜嚟釣魚，兩位以上只需另付$150，就可以租用燒烤爐。

加裝EcoBoost技術及Turbo，令呢台2.0L直四引擎無論馬力及扭力都有出色發揮。

全車座椅都裹上高級皮革，舒適與豪氣兼備。

PowerShift波箱採用雙離合器結構，對應手動加減波功能。

天幕頂夠晒大，全車乘客都可受惠。

引擎容積唔算大，不過馬力有成240ps，採用雙尾喉都好合情合理。

今次同行嘅S-Max，搭載咗由廠方自行研發嘅2.0L EcoBoost引擎，240ps馬力相當可觀，至於峰值扭力34.7kgm亦早於1,900rpm已經到位，仲可以一直維持至3,500rpm，配合採用雙離合器結構嘅六前速PowerShift波箱，轉檔、加速都比傳統手波爽快。今次試車全團七個人都係靠S-Max接送，滿載之下喺大美督經新娘潭路入鹿頸嘅山路上用手動轉檔，起步、爬頭都有心有力，唔似一般七人車會「適可而止」。而且S-Max嘅懸掛設定比同級MPV硬朗，面對多彎以及較急的彎路，操控表現依然準確穩定。

善用FFS　座位變化話咁易

作為MPV，當然唔少得實用多變嘅車廂布局，中、後排附設獨有嘅Ford Fold Flat System（FFS）功能，將兩排座椅摺起、放平，就可變成大片置物平台，而且整個過程都比同級歐洲對手簡單，女士都可單獨完成。筆者覺得最抵讚係覆蓋晒前、中、後排嘅大天幕車頂，令全車乘客都可享受開揚景致，賞月至啱！

賞月去處　新娘潭比比皆是

中秋佳節，BBQ兼賞月係熱門節目。沿住新娘潭路往鹿頸方向就有唔少燒烤區，當中新娘潭、降下坳及鳳坑對出都有免費泊車位。此外，降下坳燒烤場內設有公廁，至於新娘潭燒烤場行前少少，對面馬路亦有一座廁所，人有三急唔怕冇地方解決。若果嫌郊野公園光線不足，位於鹿頸嘅金門海水魚場亦係唔錯嘅目的地，魚場喺中秋節營業至凌晨12時，夜釣之餘，仲可以租爐慢慢燒，雖然燒烤食品、飲料及燒烤叉都要自備，不過帶唔夠嘢飲嘅話，都可幫襯魚場補給，最重要係場內可以免費泊車，夠晒方便！