北京直擊搶先體驗iPhone 5s指紋開機爽

星期三早上Apple首次在北京召開iPhone 5s和5c產品發布會，誰知只係重播幾小時前美國Cupertino總部發布會片段，再加普通話傳譯而已。好在一樣設有新產品體驗區，可以即場試玩iPhone 5s跟5c。iPhone 5s雖則外觀跟iPhone 5幾乎完全相同，不過行64-bit速度快啲，影相功能又強咗，並且有指紋識別功能，仍用4s的朋友都值得升級。

iPhone 5s（右）機背設計跟iPhone 5幾乎如出一轍，最特別是追加金色版；而iPhone 5c（左）就用上膠殼，機身亦略比5s大。

iPhone 5c有五色膠殼揀，質感跟色澤相當好，而且非常襟刮。

雖然發布會只是播片，但完場後同樣設有產品體驗區，傳媒都搶住試玩iPhone 5s。

美國發布會用《Infinity Blade III》遊戲示範A7處理器的運算能力。

雙LED閃光能拍攝到色溫更準的影像，跟圖左一般手機閃燈效果比較，圖中央的iPhone 5s拍攝效果明顯高一班。

iPhone 5c彩色機背配襯彩色穿窿機殼，可撞出30種效果。

iOS 7拍攝介面有改進，可拉動畫面揀選拍片或影相時的比例，亦能簡易轉換濾鏡效果。

新增指紋保安系統「Touch ID」，每部機可儲存最多五個指紋檔案。

iOS 7對應Multitasking多工處理，要關掉工作，只需用手指一拉即可，操作方便。

跟原來iPhone 5（黑）相比，iPhone 5s（白）換上雙LED閃燈設計。

無論是新iPhone 5s和5c都預載了如《Keynote》及《iMovies》等五套自家Apps，慳番三百多元。

雖然發布會上Apple只提「China」而無提到「Hong Kong」，實情香港一樣會在9月20日正式推出這兩部新手機。唔少網友睇完發布會的串流直播後，都覺得兩部新機同是4吋屏幕，同樣800萬像素鏡頭，只是換上新顏色機殼，無太大突破。表面睇確實如此，但唔少細節改動係肉眼未必即時睇得見，例如有金、銀白及太空灰三色的iPhone 5s用上新感光器提升影像質素，配備雙色LED閃燈令色溫更準；甚至用上64-bit處理器A7來改善操作性能，真係要用過先體會到。

iOS 7簡單易用

發布會的體驗時間有限，官方話影相效果快iPhone 5一倍，孰真孰假就要留待日後先下定論，而在美國發布會上示範的遊戲《Infinity Blade III》都無預載於試玩機裏，但iPhone 5s及5c皆預載的iOS 7就即時玩得到。iOS 7除了介面改動外，實際操作都幾順暢，按兩吓Home鍵進入預覽畫面，可實時睇得見Multitasking多工處理下的多個頁面，要關掉其中一個工作頁面，就只需按着並將其拉走即可。iPhone 5s除搭配64-bit運算A7處理器外，還內置另一枚功耗較低、以應付簡單工作的M7處理器，令電量可更見使，如3G通話時間就能去到10小時。另外，iPhone 5s亦支援13個4G LTE無線頻段，亦係手機界最多，更易接上高速網絡。

Touch ID手指認證開機

iPhone 5s另一獨門功能就是在Home鍵上加入指紋掃描器，透過指紋辨識認證身份，名為「Touch ID」。設定時會要求用家在新Home鍵上按大約六次來確認指紋，之後再用手指的不同邊緣位置重複做多幾次辨識程序，成功後即可以手指代替數字密碼登入手機，並且可應用在App Store或iTunes Store付款，只希望其Home鍵唔好似4s咁易壞就好。配件方面，今次就有iPhone 5s顏色皮版保護殼，手感幾好，當然亦可應用在iPhone 5之上。至於五彩膠版iPhone 5c同樣跟上新保護殼，開窿式設計，並設六色選擇，可撞出30種色水配搭，外形都幾潮，不過略嫌機價未夠親民，好在跟機時會送埋《Keynote》、《Pages》、《Numbers》、《iMovies》及《iPhoto》這幾隻自家Apps，計落都值三百多元。