大家平時買衫、買鞋，會以乜嘢做準則？抵唔抵買、襟唔襟着、款式襯唔襯自己……夠喇夠喇，Stop！我唔係話以上嘅答案有唔妥，不過例牌啲囉，問心嗰句，其實有時（甚至係好多時候）都係明星效應作祟。好似Air Jordan玩復刻，無論出番任何一代都有大把粉絲追捧入貨，無非「波神」嘅號召力使然，至於即將開售嘅AJ Ⅳ Retro Green Glow更加唔講得笑，事關早於今年暑假，NBA球星Chris Paul以及Blake Griffin，甚至波神Michael Jordan本人都着住佢現身，有佢哋做生招牌，點只籃球迷，潮人都要爭埋一份啦！

AJ Ⅳ Retro Green Glow $1,249 （下周一上架）

AJ Ⅴ Retro $1,249 （本月23日上架）

無論係拖住囝囝嘅Chris Paul、單拖嘅Blake Griffin，以及風采不減當年嘅波神本人，今年夏天都不約而同着住AJ Ⅳ Retro Green Glow現身。

Blake Griffin

Jordan

鞋身以至鞋底嘅淺綠色位置，令人有疑似夜光嘅錯覺。

灰×綠首度用於AJ Ⅳ身上，夠晒新鮮感，而且易襯衫、冇得輸。

由AJ Ⅲ開始嘅外露式Air氣墊，AJ Ⅳ變得更大、更搶鏡。

鞋面採用麖皮製成，更添時尚美。

鞋舌背後嘅Air Jordan字樣專登上下倒轉，夠玩嘢！

Jumpman Logo加上Flight字樣，喺鞋舌正面清晰Show畀你睇。

AJ Ⅴ係首款採用透明底嘅AJ，今次嘅Retro當然跟足。

作為正正經經嘅復刻版，AJ Ⅴ Retro鞋舌背後嘅字樣亦都「循規蹈矩」。

鞋側嘅透氣位、23號繡字，仲有中底嘅鯊魚牙圖案，都喺今次嘅復刻版還原出嚟。

Jumpman Logo清晰出現於鞋舌及鞋踭位置。

外露式嘅Air氣墊，復刻版又點少得？

AJ Ⅳ Retro Green Glow 群星力撐

其實AJ Ⅳ一直以嚟都充滿潮味，好似喺1989年第一次推出時，已經喺名導Spike Lee嘅《Do the Right Thing》現身；去到2006年，知名Rapper Slick Rick更加揚言，要入齊當年所有嘅AJ Ⅳ復刻版本。至於今次嘅Green Glow，除咗有球星力撐，本身設計亦係一絕，事關灰×綠嘅配色組合，係AJ Ⅳ面世以嚟嘅第一次，撞色效果分外突出，有Gimmick又易襯衫，最煞食係外底、鞋帶扣，以及鞋踭嘅Jumpman Logo都用咗淺綠色，令人有Glow嘅錯覺，搶眼之餘又勁有新鮮感，唔搶手至奇！

AJ Ⅴ Retro 原味濃

至於同樣喺本月復刻上架嘅AJ Ⅴ Retro，配色用咗白×紅×黑，正正係最原汁原味、絕對冇得輸嘅AJ代表顏色，難怪受關注程度同AJ Ⅳ Retro Green Glow一樣高企。顏色跟到足之餘，原裝版本嘅多項細節，亦都喺今次嘅復刻版重現，包括透明外底、前掌中底嘅鯊魚牙圖案、鞋帶扣、鞋身後段外側嘅「23」，以及鞋舌與鞋身兩側嘅透氣位，原味程度達到「超濃」級數，身為波神超級粉絲者，唔買唔安樂！

查詢：2528 0391（灣仔莊士敦道Jordan Store）