在電梯中遇上兩位在電訊公司工作的男人，我不認識他們，只從他們的制服得知他們是哪家公司的。短短一分鐘的「Lift程」，聽到以下對話：「嘩，尋日幾好彩呀，執到部NoteⅡ！」「係呀？」「係呀！幾正呀！喺廁所執到！」「喺廁所？」「係呀，不過唔好彩係嗰日我自己個電話又唔見咗，不過冇所謂啦，我嗰部係幾百蚊貨仔，但執到部NoteⅡ！我咪即刻賣鬼咗佢囉，千三蚊～」「嘩，咁正！」「係呀，冇計吖，嗱，唔係我衰！我都喺廁所等咗成二十分鐘！佢都冇打番嚟，冇辦法啦！」電梯剛到達他們的那層，兩男邊談邊步出電梯，我一邊聽一邊火滾。是甚麼的道理？拿了人手機還理直氣壯，覺得自己沒有問題，問題是在於你沒有打電話回來啊，都是你的錯！我遺失手機經驗多，我覺得弄丟過電話的人應該都很明白失去電話的慘痛感覺，亦應該很清楚，如果人家遺失電話也會受到同樣的痛─除了手機的金錢價值外，還有裏面的照片、電話簿或Schedule等，買也買不到。所以每當我拾到手機時，想像到那人的痛，就會找方法聯絡上機主領取失物。我認為是相對的，我也曾試過漏了手機在的士上，司機主動把手機送回來，更拒絕收取薄酬。路不拾遺，是基本吧。