北京直擊 Meizu MX3 平玩八核

今個九月手機威晒，除咗有一大堆新機排住隊準備喺柏林IFA展覽等出場外，內地亦有Meizu（魅族）同小米推出新機，而搶飲頭啖湯嘅就係Meizu，日前於北京水立方發布新一代旗艦手機MX3。新機跟潮流改用上5.1吋大芒，又特別重新設計自家Flyme介面；再加上八核心處理器同埋800萬像素背照式鏡頭，集A級硬件於一身。最驚喜一定係價錢，最平16GB版本只需¥2,499，性價比極高，難怪唔少人即場落訂！

香港售價待定（九月下旬推出）

同上年一樣，Meizu繼續喺北京水立方搞新機發布，要大牌子先申請到o架！

內地售價好合理，最平16GB不用¥2,500，抵買！雖然此機冇得插記憶卡，不過就有128GB版本，大把位用！

大會邀請咗近千位傳媒同魅友（即Meizu粉絲）到場，逼爆！

Meizu非常重視今次發布會，CEO白永祥親自到場講解MX3新功能。

機背採用塑膠物料，另外採用弧邊設計，手感唔錯。

機面僅得一粒輕觸鍵，非常簡約。

於屏幕下方由下而上一掃，就會彈出運行中嘅程式，向上掃就獨立關一隻App，向下一掃就一次過Kill Apps，比舊介面方便。

港版有Google Play之餘，亦會有自家嘅「應用中心」，Apps選擇更多。

新增《畫板》App，筆觸、顏色全部有得轉。

採用800萬背照式鏡頭，搭載F2.0大光圈，相質有保證，而且拍攝介面仲追加即時濾鏡等功能。

同上兩代一樣，機背殼拆得出嚟，不過就冇得換電。

MX3（左）似足MX2嘅加大版，不過原來只係比MX2重1g而已。

粉絲點睇：
湖南Meizu「魅友」CK說：「比MX2有很大的進步，外觀、功能都更完美！最喜歡Flyme 3.0介面，有很多細節和新功能，我一定會換機！」

細緻15：9大芒

其實Meizu已事先張揚話會推出大芒手機，最終MX3就採用5.1吋屏幕，配合Sharp出品New Mode 2技術，睇落色水冇咩「味精」感覺；另外屏幕亮度分成2,048級，調校光暗時超精準，有心思！值得一提，有別於一般屏幕嘅16：9比例，此機比例係15：9，解像度則為1,800×1,080；雖然顯示仍然好細緻，不過睇部分高清短片時就會有黑邊，有啲礙眼。

醒目八核CPU

依家大部分新手機都內置四核心處理器，效能雖然夠用，不過往往超食電。反觀MX3特別搭載Galaxy S4都採用嘅Exynos 5410八核心處理器，呢款處理器分別內置一組高效能以及一組低功耗嘅四核心處理器，手機會因應情況自動轉換處理器運行，待機、上網時就用低功耗處理器，打機的話就改用高效處理器，電量和效能取得平衡。有讚亦有彈，話就話處理器慳電咗，不過MX3電池僅得2,400mAh，加上一體成型機身冇得換電，看來都要隨身攜帶後備充電器。

2.9mm窄邊框

國產機嘅設計同手工成日畀人彈，今次MX3應該可以令大家改觀。佢承襲MX2風格，一體成型，採用不銹鋼邊框，而黑色機面僅底部設有一個發光輕觸Home鍵，設計簡約；而底殼則打磨成弧邊，手感順滑。大芒機一向較難單手操作，為方便用家手持，廠商除將機面左右邊框縮窄至2.9mm之外，仲特意從軟件着手，將介面升級至Flyme 3.0。新介面睇落同舊版分別不大，Icon同樣擺晒喺主頁，不過就有大量改動，好似屏幕底嘅Smart Bar會因應用家習慣而自動左右微調位置，單手都可以操作到原生Browser七成功能；聯絡人資料頁面設有左右兩個撥號鍵，左右手都可以輕鬆撳到，相當貼心。唯一可惜就係Meizu於內地與多米音樂、豌豆莢、樂視網等公司合作推出影音服務，香港行貨就應該用唔到。