Bandai嘅模型台柱Master Grade（MG）1/100系列，不經不覺面世接近18年，當中最好賣嘅MS，當然係自護軍口中嘅「白色惡魔」RX-78元祖高達，由1995年嘅第一款MG RX-78-2開始，之後仲有Ver.1.5、Ver.Ka、One Year War 0079及Ver.2.0等多個版本，粉絲一面嗌搶錢，亦一樣乖乖打開銀包進貢。如今發展到Ver.3.0，又可以有幾突破？

MG 1/100 RX-78-2 Gundam Ver.3.0 建議零售價：$459

Ver.3.0標榜高可動性及外甲連動效果，單膝跪地加出劍呢啲高難度甫士都難唔倒佢。

雖然RX-78-2已經出過好多次，但係論造型美及可玩性，今次嘅MG Ver.3.0的確係最突出嘅選擇。

嫌武器唔齊全嘅話，大可考慮另購擴充組件，訂購價$150（未連運費），詳情可到http://www.p-bandai.hk/hobby瀏覽。

武器大抵源自Ver.2.0，只係Beam Rifle及盾牌有少少變動。

Core Fighter可以變成核心駕駛艙，安裝入高達腰部。

Ver.1.5時已經有，但係喺Ver.2.0取消嘅後備駕駛艙，於Ver.3.0復活，相比起由Core Fighter變成嘅駕駛艙，用咗佢，上肢嘅可動性都會好啲。

留意腳眼嘅環形外甲，可以換成故事後期追加磁性塗膜時嘅密封式設計（右）。

背包都有可動外甲，噴嘴內亦可加裝透明噴射特效組件，但要自行上色。

屈起大腿時，前後甲就會反向移位，前甲兩塊灰色組件仲會自動趟下，遮住穿崩位。

腳掌分成三組設計，增加接地性之餘，亦更加貼近人體動作。

屈臂時，前後裝甲都有連動效果，並要留意手肘嘅屈曲度超過150°，可動性之高顯而易見。

膊頭關節有活掩揭開，藉此增加舉臂幅度，肩甲又可以微微向外展開，減少對上臂嘅影響。

有人話MG Ver.3.0似係1/144嘅RG放大版，都唔係冇根據，事關傳統嘅元祖高達都係以紅、白、藍三色為主，MG Ver.3.0學足RG，喺呢三種基本色之中再分深淺，最明顯係白色部分追加咗兩種程度嘅灰色，而紅藍交錯嘅胸甲組件，亦喺側邊加入一種淺色分件，手肘及小腿關節就跟埋銅色貼紙扮金屬Feel。個人認為MG Ver.3.0唔只係RG嘅放大版，其實話佢係1/100嘅台場版仲貼切，事關隨盒附有嘅新款警示標誌，大部分都係參考咗東京台場嘅1/1高達設計而成，就算你未去過台場朝聖，都可以靠呢部MG Ver.3.0望梅止渴。

進化版連動結構

近幾年嘅MG、PG，以至細細隻嘅RG都玩連動結構，MG Ver.3.0又點會例外，而且玩得更盡，扭動部分關節時，以不同深淺色代表嘅分層裝甲，就會發揮連動趟甲效果，例如屈起大腿時，前後甲會分開之餘，前腿嘅兩塊灰色組件就會自動趟下，而獨立嘅膝甲組件亦新增雙重上推效果，可以近乎毫無穿崩位嘅狀況之下，擺出TV第一集劈完渣古單膝跪地收招嘅型絕甫士。此外，為咗重現背包嘅精密內構，MG Ver.3.0加入可動外甲，噴射口內部仲可以嵌入透明嘅特效組件，認真度之高，絕非單純將RG放大咁簡單。

擴充Boxset難抗拒

模型結構係全新設計，不過武器就沿用Ver.2.0嘅模件，隨盒只有Beam Rifle、Bazooka和盾牌各一件，改動只係Beam Rifle嘅把手由深灰改成淺灰色，盾牌嘅螺絲位置換成分件處理而已，以一盒原價￥4,500嘅模型嚟講，難免令人有少許失望，到底其他武器去咗邊？原來流星錘及Beam Javelin長矛，就以擴充組件Boxset要在Premium Bandai網上限時訂購，Boxset內仲有一支Bazooka及黃色LED燈裝置，後者安裝之後可以令雙眼發光，雖則有搶錢之嫌，不過作為Die Hard粉絲嚟講，相信都係無法抗拒。

查詢：2433 1828（瑞華行）