對科幻迷而言，今年睇得最過癮嘅電影，相信非《悍戰太平洋》（Pacific Rim）莫屬，睇住班平均高度有成80m嘅機甲獵人（Jaeger）打怪獸，由維港打到落中環，再橫掃葵涌碼頭，四周嘅高樓大廈好似突然間縮細晒，變咗積木咁款；元祖高達RX-78-2都只係有18m高，咁計落Jaeger仲唔係科幻界嘅巨無霸？Of Course Not啦！《變形金剛》（Transfomers）早喺80年代嘅G1故事中，炮製出218m嘅博派巨人「大力士」（Metroplex），Jaeger拍埋去，睇怕連腰位都未到。

Transformers Metroplex
建議零售價：$1,149.9

作為博派之城，當然要有完善配套，左胸可以變成直升機坪之餘，頭部就化身為防空炮台。

基地形態嘅大力士，前半段由兩條大型跑道構成，十足陸上航空母艦。

隨盒附有大力士嘅小助手「蹦蹦跳」（Scramper），可以變成小跑車，當大力士變成要塞或基地形態，就會喺城內巡邏警戒。

變形之餘仲Gimmick多多，就以基地形態為例，跑道上設有起重臂，右胸又可打開變成斜坡行車道。

頭部備有正常及護眼罩兩款形態，而且唔使換件就變到。

大隻成咁，擺任何甫士都分外有力量感，無人能敵。

繼大力士之後，喺機設中同屬珍寶級嘅巨人福特（左）及毀滅大帝，可會因為老變30周年就到嘅關係，都有望推出新版本呢？

唔只原裝機設大得恐怖，就算變成玩具版本嘅大力士，依然夠晒震撼力，話說Hasbro喺80年代尾都出過G1版本嘅大力士，有成12吋高，可算係開創老變玩具嘅巨無霸先河，冇大力士，就唔會有之後嘅毀滅大帝（Trypticon）及巨人福特（Fortress Maximus）。至於為慶祝老變30周年而重新設計嘅新版大力士，更加創下變形金剛商品中最巨型嘅紀錄，高度有成25吋，雖然係全塑膠製作，都有接近2.8kg咁重，絕對係噸位十足！

收腰設計更順眼

舊版大力士雖然都有12吋高，但整體比例過於臃腫，難言美感，新版就唔同晒，造型參考電玩《Fall of Cybertron》，四肢健碩之餘仲有番條腰，似足嗰啲練出人魚線嘅肌肉男，加上全身都滿布線位，隨盒又有大量標示貼紙，令細緻度大增。至於變形設計跟足原裝機設，除咗機械人模樣，仲可以變成基地形態及要塞形態，放入另購嘅迷你變形金剛嘅話，就可以變成博派之城，作為超級老變粉絲者，一定會玩到上癮。

25吋高史無前例

或者你會擔心，咁大隻、又咁重，睇怕新版大力士都唔識點郁，不過筆者試玩過後，可動性絕對有驚喜，雖則唔似SHF拉打或MG高達般任你扭，雙手除咗可以前後轉動，仲可以向橫水平舉起，就連條腰都可以360°轉，加上大部分關節都採用齒輪設計，增加負重能力；美中不足係即使腰位以至膝頭都有齒輪關節，但無奈上半身實在太大、太重，極其量只係擺到A字形站姿，想大幅度屈腿又要企得穩嘅話，難免失望。不過總括而言，巨型、有型、三變、Gimmick多，加上超出預期嘅可動設計，新版大力士已經係交足貨有餘，尤其是25吋呢個前所未有嘅Size，除非Hasbro會出新版毀滅大帝或者巨人福特，否則都幾難挑戰到佢。

查詢：2738 8300（Hasbro HK）