呢幅相並非甚麼靈異照，亦非Photoshop執出來，查實係Light Painting（光影塗鴉）的新玩法。以往影Light Painting，不外乎企定定用電筒寫字畫圖，玩多幾次都悶。想有新意？有人就將單車融入Light Painting，索性用單車代替電筒。究竟點影？筆者請來著名攝影達人Will Cho，去科學園附近的單車徑示範，學嘢喇各位！

Will選擇在車架前叉位置貼上LED燈條。外國就有玩家貼在車轆上，一切視乎玩家想點玩。

Will Cho本身係用Sony NEX-5R無反相機及Giottos三腳架，所以裝備不一定要至貴、至頂級！

Step 1

Step 2

Step 3

Step 4

Step 5

Step 6
未調白平衡

把白平衡調冷

Will Cho

裝備篇：LED燈條貼車邊

影Light Painting時，單車款式不限，最重要是替單車貼上LED燈條。LED燈條亮度愈強愈好，夠光先可以玩到效果，等相機可以捕捉長長的光軌；而且LED燈條可以自己調校顯示顏色，玩法比用普通燈多變。LED燈條可於深水埗鴨寮街找到，大約百多二百元一條。

用超廣角鏡頭

採用相機方面，Will Cho教路：「即使係無反機仔、甚至手機加Apps，都可以玩到咁嘅效果。最緊要係器材可以設定長時間曝光。」另外，Will Cho推介大家用超廣角鏡頭，因為佢可以表現強烈透視感，影單車光軌時就更有張力。至於三腳架就更加係必備，因為曝光時間通常都要15至20秒左右，冇可能手持拍攝。

實拍技巧 Step by Step

Step 1 影相之前，先調校Setting。入門玩家宜用快門先決，因其操控較簡單；如果閣下係進階影友，就可以用手動Mode，並盡收光圈及調低ISO。曝光時間則要視乎花式長度，一般為15至20秒左右。如現場環境較光，要加上ND Filter減光，增長快門時間得來又不怕曝光過度。

Step 2 找個高角度位置，由上而下影落單車徑，就可以影到完整光軌。

Step 3 事前必須決定踩出S形、Z形抑或蚊香形圖案，切勿即興。單車也應慢速駛過鏡頭，等相機有足夠時間捕捉光軌。

Step 4 如果想在成品中見番自己個樣，就要在拍攝末段停車，鏡頭方可捕捉到單車同人樣；相反直行唔停車，就可以拍出不見人樣的效果。

Step 5 要在車來車往的單車徑做唔同花式，必須要注意安全，亦要留意附近無其他車才開始拍攝，否則要讓路予其他車輛的話，就會影響構圖。

Step 6 Will Cho表示可以用Photoshop執白平衡，因為街燈會令到畫面偏黃，將色溫校向冷色的話，相片效果較討好。

攝影達人 Will Cho小檔案

約兩年前開始踏上攝影之路，沒有十幾廿萬元的專門器材傍身，也沒有受過專業攝影學院訓練，單憑一部方便實用的無反，拍出一幅又一幅在facebook瘋傳狂Like的作品。

跟達人夜攝騎行

沙田新城市廣場將會在8月至9月期間舉行「主題騎行之旅」單車活動，其中8月24日及9月21日的活動更是由Will Cho親自帶隊，一齊由新城市廣場出發踩去科學園，並教授大家單車Light Painting的技巧。有興趣者只要在商場消費並繳交$220報名即可參加，名額20位，先到先得。是次活動大會已準備了裝上LED燈的單車，大家帶攝影器材就得喇！

查詢：2478 3880