俗語有云：男人愛高達，女人唔明白。不過此話又無法同樣應用喺《美少女戰士》身上，呢齣當年風靡日本，以及中、港、日，影響力甚至遠達歐洲及美國嘅日系動漫，唔只迷倒萬千小妹妹，甚至唔少男生都口不對心，一邊罵一邊睇，或者吸引佢哋嘅並非動畫中嘅月野兔，而係港版MV中嘅周慧敏吧！Anyway，不經不覺《美少女戰士》已經面世20周年，成為80後集體回憶，Bandai嘅SHF系列就向經典致敬，「愛與正義，着水手服嘅美少女戰士」，第一主角月野兔（Sailor Moon）就以140mm嘅高度重現人間。
（設計對白）
基本面相有四款，至於單眼Look及喊包Look屬於「初回封入特典」嘅專有配件。
隨盒附有專用底座，擺大動作甫士必用。
盒內備有兩支彎月神杖，一支係基本形態（左），另一支就多咗幻之銀水晶。
論可動性絕對唔會輸畀SHF拉打，大部分招牌甫士都做得到。
除咗月野兔，其餘四位內部太陽系戰士亦大有機會接棒加入SHF行列，當中Sailor Mercury水野亞美已經鐵定今年10月推出。
水手服華麗塗裝
SHF向來主打幪面超人角色，擺明車馬以男性Kidult為銷售對象，不過Bandai早前宣布，將於年尾推出Ver.2.0版本，估計拉打角色可能已經出到乾塘，除咗出Ver.2.0嚟維持生產線，廠方更決定開拓女生市場，趁住《美少女戰士》20周年紀念，一於靠呢班水手服英雌救市（雖然SHF早前亦推出過《光之美少女》戰士，不過論號召力絕對同《美少女戰士》冇得比）。至於打頭陣嘅月野兔，採用TV版第一輯嘅造型，高度約140mm，老老實實，整體造型的確省鏡，係有史以來最有外在美嘅月野兔可動Figure，大眼睛上色準確之餘，水手服嘅藍、白、粉紅組合都用咗珍珠色，稍稍添上華麗效果。
特典專屬盞鬼Look
造型出色之餘，可動性亦秉承SHF一向嘅高水準，簡單嚟講，就係SHF拉打擺得出嘅甫士，月野兔都一樣做到冇難度，美中不足係頸位只設單關節，即係頸與頭嘅連接處，頸與身體就冇可動關節，某啲角度之下令月野兔出現少少寒背情況，解決方法係盡量將上肢向上仰，令頸位冇咁覺。另一方面，美少女戰士個個身形纖瘦，對腳似筷子咁幼，變身SHF會唔會企唔穩？老實講，接地性的確唔及拉打，不過又未至於企都企唔到，如果真係要擺大動作嘅出招甫士，隨盒附有專用底座幫手。至於今期上架嘅「初回封入特典」，就送單眼Look及喊包Look兩款面相，加埋造型鬼咁精靈嘅露娜貓，實行逼粉絲冇得忍手，早買早享受。
太空母艦泊入銅鑼灣
SHF有Sailor Moon幫80、90後嘅女生搵番集體回憶，各位Brother唔使唔抵得，銅鑼灣時代廣場嘅1:3「高達Vs紅彗星」，你又朝聖咗未？就算你已經去過，今期都要去多次，事關有史以嚟最大嘅太空母艦White Base模型，已經泊咗入廣場嘅二樓大堂進行全球首展，全長有成10m，仲要凌空吊起，論氣勢，冇得輸！溫馨提示：是次嘅高達展覽為期只係去到9月1日，想朝聖就要拿拿臨Take Action，詳情可到facebook嘅「Hong Kong Times Square」專頁瀏覽。
(c)Naoko Takeuchi/PNP, Toei Animation
查詢：2433 1828（瑞華行）
