《Killer is Dead》斬妖斬得更癲

Scarlett、Betty、Vivienne

唔知大家仲記唔記得，上年Jessica C.曾經Cosplay遊戲《Lollipop Chainsaw》嘅電鋸性感女角？開發該遊戲的原班人馬今年再出一隻風格同樣好Cult，但玩得更癲的新作《Killer is Dead》。主角由電鋸索女變成右手長刀、左手機械臂的風流變態男，既要斬殺妖孽，又要抽時間同各地佳麗搞關係換取強化機能。今次雖無JC，但就有書展o靚模Diva、Mika同Ava Cosplay遊戲女角，一樣有睇頭！

Scarlett、Betty、Vivienne

除了打打殺殺，男主角亦要在「花花公子模式」中與各國佳麗周旋。

呢副並唔係西德出品的賭神眼鏡，而係最新功能X-ray透視眼鏡，唔係睇麻雀、啤牌，而係用嚟睇女！

男主角左手義肢仲可變成電鑽，好有「鐵男」Feel喎！

遠距離攻擊時，按L1就可以用左手義肢瞄準發射子彈。

呢隻倒轉頭的怪物叫Alice，其實原本佢係一個楚楚可憐的少女；要解決佢就一定要斬佢個頭。

當右手日本刀吸滿血後，攻擊性能就會大大提升，亦會透出藍光。

戰鬥時速度感極強，喪劈喪斬都不失為好辦法。

要透過蒐集玫瑰同水晶提升武器的能力。

Cult版《人中之龍》

今次Kadokawa Games跟Grasshopper Manufacture再次攜手合作，推出《Killer is Dead》，明顯比前作《Lollipop Chainsaw》玩得更Cult。遊戲用漫畫風格描繪角色同場景，內容圍繞暴力同情色，感覺似《人中之龍》，遊戲製作公司更以「送給21世紀大人們的愛與處刑的幻想曲」作宣傳主題。遊戲背景設定在未來世界，主角「蒙德」剛入職一間處刑事務所，工作範疇是接受各種古古怪怪的委託，要到世界各地甚至月球去跟異想天開的罪犯周旋。其實主角蒙德設定都古怪兼變態，迷戀血、月亮同半熟蛋，而且右手係拎住日式長刀，左手又會裝上合金義肢，變槍又得，或者學埋《鐵男》變電鑽都得！

「最後審判」處決敵人

遊戲強調「反應」，動作速度感甚強，總之一切以爽快、刺激官能為主！試玩時基本上都無時間考慮要出乜招式，狂撳掣喪劈喪射都不失為好辦法。其實男主角的攻擊招數都幾多變，右手拎住名為「月光」的長刀，會吸敵人的血，吸得多還會閃出藍光提升攻擊能力；裝上合金義肢的左手可發射子彈，同樣靠血來驅動，左右手各有不同的攻擊風格。得普通喪斬、開槍、衝刺、迴避等動作當然未夠喉，當Combo連擊數去到最高時，更可發動「最後審判」，以殘忍的「暗殺」、「虐殺」、「處罰」同「執行」這四種方法了結各個怪形怪相的目標人物，機迷一定覺得過癮！

談談情強化能力

除硬橋硬馬的戰鬥之外，《Killer is Dead》亦有好「軟性」的一面，就係加入「花花公子模式」（Gigolo Mode）。男主角蒙德身懷異能，兼有啲病態，估唔到亦風流成性，在「花花公子模式」中，要與同來自世界各地的「蒙德女郎」（Mondo Gal）談情說愛，引誘女角提供特別道具以完成各個棘手的任務；至於任務過程如何，恕小記唔太方便透露，就由大家自己去領略吧！「蒙德女郎」有幾索？跟007「邦女郎」都有得揮，在初回特典中現身的吸血孃Betty就係一例。遊戲日文版今日就有得玩，一個月後再會追加中英日文版。不過男玩家大多數性急，與其等多一個月睇中文字幕，不如早買早享受好過。