《藍精靈2》夾手夾腳救美芝

今個夏天香港會被藍海攻佔！不過唔係嚟踢波嘅曼城，而係「十分勁」的藍精靈。除了有過百隻1比1的藍精靈兵團在Mikiki展出外，《藍精靈2》電影版亦會於8月1日上映。另一方面，用上電影版場景的《藍精靈2》遊戲亦已開賣，遊戲以橫向捲軸動作方式進行，每隻藍精靈都身懷特別技能，齊心合力救美芝。初時以為好易玩，但原來唔同朋友合作係好難玩o架！

精靈爸爸的特技為投擲藥水凝結敵人。

美芝要到好後期先可以解鎖得到，她最特別是可空中飄浮。

第一版Boss巨型青蛙會噴出綠色毒霧，唔小心掂到就即死！

藍精靈另一死敵阿沙會係第二版的Boss，身形大藍精靈何止十倍！

邪惡巫師加達都會親身上場，藍精靈危險速逃啊！

點樣對付飛天蟾蜍？以精靈爸爸的凝結能力，再跳起踩佢都係好方法。

電影版主場景係巴黎，遊戲版入面都有得玩！

完成每個關卡後，就會派發大家的成績表；要留意每死一次，藍莓就會跌晒歸零，臨過關前死就好唔抵！

場景關卡可以自由選擇，若儲唔齊金幣可以重玩再重玩。

每一個關卡都可以重新揀選所操控的角色。

橫向捲軸四人齊玩

藍精靈可以話係好多七、八十後的童年回憶，咁啱今年係藍精靈誕生55周年，以及藍精靈之父Peyo的85歲生忌，所以就順理成章發大嚟搞囉！其實兩年前都出過隻《藍精靈Dance Party》，不過由於只得Wii版本，而且只係翻炒《Just Dance》第一、二集，仲要香港並無行貨；今集《藍精靈2》改用橫向捲軸動作方式進行，兼且有PS3同Xbox 360版本，香港藍精靈Fans終於有得玩！不過提醒大家，呢隻遊戲唔應該一個人玩咁自閉，同埋朋友一齊合作先至過癮，最多可支援四人一齊玩。

收錄電影主要場景

遊戲版故事情節同場景設計，都同電影版有關連，先玩遊戲再睇戲就更易投入。今集故事係講好想食藍精靈兼取得魔法精華嘅邪惡巫師加達，專登去巴黎鐵塔施法，生產咗兩個臉上有藍色雀斑但實情係灰色的山寨藍精靈；後來發覺山寨版唔掂，於是加達就綁架美芝，跟住精靈爸爸要率領一眾藍精靈重回「人間」救美芝。

遊戲版設有六大場景、逾30個關卡，好似電影版中的主要場地巴黎、紐約及迷幻森林都有出場，遊戲版就再加入專屬場景幽靈森林、北極凍原同埋熔岩叢林，每版最後都要打巨大Boss，好似第一版嗰隻會伸出長脷同噴出綠色毒霧的巨型青蛙就唔易應付！

重玩集齊獎勵

遊戲登場角色有九位，精靈爸爸、百厭星、論盡仔、嚕囌王、阿靚同美芝都會出現，每個角色都各自有特別能力，如精靈爸爸識得掟藥水凍結敵人，智多星跳得好高，嚕囌王可以踩爛腳下巨石、深入秘道擸藍莓。揀角色都好考功夫，因為唔少秘道係要靠唔同角色的特殊能力先至開啟得到！第一次玩入唔到秘道又唔使唔忿氣，可以再揀另外一個角色再玩過，不過角色要靠賺金幣去解鎖，愈玩得耐就有愈多角色可揀！

正如之前講過，多人一齊玩先至好玩，例如自己控制的藍精靈可頂起另一個玩家藍精靈令佢跳得更高，不過筆者就比較黑心，試玩時不斷嘗試將拍檔控制的藍精靈推落街，或者塞住山洞出口唔畀拍檔執藍莓。就算其中一隻藍精靈陣亡都唔緊要，只要有隊友在關卡中執到草菇就可令隊友翻生，至於隊友救唔救你，就睇你人緣喇！