捱出頭來 嘍囉贏拉打
（右）S.H.Figuarts Shocker Combactman
建議零售價：$299
由昭和到平成，打足幾十年，歷代拉打最具代表性嘅奸人Icon「嘰嘰兵」（Shocker Combactman）從未有一次打贏過，不過今期終於喺玩具界爭番啖氣，與同系嘅拉打舊1號一齊上架，講真嗰句，舊1號只係將之前出咗嘅「櫻島1號」改改色、換啲Parts而已，論新鮮感點都唔及嘰嘰兵，況且依家唔少舖頭嘅嘰嘰兵標價，都比建議零售價低一大截，粉絲不妨入多幾隻，就可以喺屋企重演嘰嘰兵VS拉打時人多蝦人少嘅招牌場面。
（左）S.H.Figuarts Masked Rider 1（舊1號）
（右）S.H.Figuarts Shocker Combactman
建議零售價：$299
平平哋入多隻嘰嘰兵，排排企立正敬禮，拉打迷見到腦海立刻Call Back番「撒旦幫萬歲！」呢幕經典場面。
隨盒附有右手拈銀幣嘅造型手掌，銀幣兩面都有刻紋，見出廠方冇偷懶。
摔角手造型面罩加埋銀色匕首，算得上係嘰嘰兵最深入民心嘅特徵，留意刀身印咗撒旦幫標誌。
胸、腹、腰三節都獨立可動，肋骨圖案及腰帶嘅銀色浮雕Logo，亦都製作細緻。
呢支撒旦權杖造工都算OK，不過以筆者印象之中，嘰嘰兵呢啲咁低層次嘅爪牙，冇乜幾何用到喎！
招牌絕招「風雷電」飛踢特效組件，加埋個隨盒炸彈，就可重演踢爆彈嗰一幕。
舊1號嘅最大特徵，就係胸肌、手套連埋長靴，都係淺綠色一個Tone。
舊1號都有撒旦權杖，仲要長過嘰嘰兵嗰支，不過翻查資料，係櫻島1號嗰陣先用喎。
換上特製造型手掌，就可以單手揸實炸彈。
嘰嘰兵唔怕入多件
今次推出嘅嘰嘰兵，出自初代《Masked Rider》撒旦幫嘅嘍囉卒仔，每次出場都冇對白，淨係識「嘰嘰」咁叫，根據緊身衣顏色分等級，彩色戰衣屬於隊長級、黑色印有骨頭圖案就係低級戰鬥員。今次SHF嘰嘰兵嘅上色QC絕對一流，事關緊身衣正面嘅肋骨圖案、面罩額頭嘅飛鷹圖案，以及腰帶嘅銀色浮雕撒旦幫標誌，統統都準確無誤，並冇出界、刮花等問題。可動性方面，由於沿用拉打素體，做到能屈能伸，附件就有頭尾都嵌咗金鷹頭嘅撒旦權杖，以及有撒旦幫標誌嘅匕首，最正係跟埋敬禮專用嘅右掌，幾隻排隊企埋一齊，展示對撒旦幫嘅忠心耿耿，童年回憶即刻返晒嚟。
舊1號飛踢爆彈
同期推出嘅拉打舊1號，基本造型跟早排推出嘅櫻島1號相差不遠，只係胸肌、手套、長靴換成淺綠色，複眼變成淺紅色，而銀白色嘅風車腰帶，以及頭盔背面露出嘅髮尾就一模一樣，武器方面就由櫻島1號嘅長劍，換成撒旦權杖及炸彈，加埋隨盒嘅「風雷電」爆風飛特效組件，就可重演舊1號踢爆炸彈呢一幕，對於已經買咗新1號及櫻島1號嘅死忠派粉絲而言，冇理由賣甩佢啩！
查詢：2433 1828（瑞華行）
