Huawei P6 6.18mm 機薄贏晒

$3,280

女生揀手機，首要睇樣，其次拍攝「分唇」要啱用兼好玩。Huawei新機Ascend P6就符合以上條件，坐擁6.18mm全球最薄及一體成型金屬機身，拎上手、攝落袋同樣方便有型；並支援十級美顏拍攝，自拍保證靚一靚。配備頂級規格卻僅售$3,280，平過唔少中階機，精打細算嘅女生必定Like！

$3,280

暫時只有黑、白兩色，同樣配備了800萬像素鏡頭及LED補光燈。

預載Emotion UI，程式及Widgets放晒喺面，操作自然更順手。

試相
室內唔開閃燈，相片依然有一定亮度，但稍嫌Noise勁得滯，唔夠滑。

以4mm微距拍攝，食物可放至最大呈現。

耳機防塵塞原來有支小針，拔出後就可拮開SIM卡槽，設計少見！

一體成型設計，SIM卡及microSD卡從旁插入，較為麻煩。

前置鏡頭像素達500萬，勁過唔少大品牌旗艦機。

厚度跟兩片香口膠相若，薄到呢！

提供十級美顏模式，影之前可自由調校強度。

預載三款介面主題，唔夠的話可上網下載。

連相片的RGB色調也可調校，公版功能冇得比！

預載《Permission Manager》，可管理個人資料的存取權限，保障私隱。

Benchmark得分唔算高，但實測見撥頁、打機其實好順。

電池得2,000mAh，唔夠用一日，好彩開咗節能模式後，可延長30%續航力。

揀智能手機，總離不開系統同屏幕質素，不過Huawei另有追求，早於一年前便發表過厚度僅6.68mm的Ascend P1S，堪稱全球最薄。雖然之後被不少後來者趕過，但品牌並沒因此而停步，反繼續研發，終於一年後再推出Ascend P6，重奪薄王之位！

香口膠咁薄

究竟6.18mm有幾薄？4吋芒的iPhone 5厚7.6mm，而跟早前號稱全球最薄的Sony Xperia Z Ultra比較，Ascend P6比佢薄0.32mm；其實，6.18mm大約等如兩塊香口膠疊埋，大家即時諗到佢薄得有幾誇張！薄之餘，難得外形亦討好，採用一體成型全金屬設計，背面有拉絲花紋，機底則微微彎曲，手感不俗，還帶有幾分貴氣，一洗國產娘味。顏色則有黑白兩色揀，嫌單調的話日後還會推出粉紅色，Pink Lady們不妨等一等。

十級美顏拍攝

要冧女生，單靠外形當然未夠，所以Ascend P6還有貼心拍攝功能。先是800萬像素BSI鏡頭配備了F2.0大光圈，影人像分外Sharp。另外它還支援「自動美顏模式」，提供十級美顏效果，由假大眼、美肌到刀削面都可逐級細執，一機在手，豬扒都變女神！而有見女士們用膳時有「相機先食」的習慣，它還對應4cm微距拍攝，鏡頭貼到食物埋一埋都依然影得清楚，放上FB自然可博得更多Like！

頂級規格中階價錢

現時頂級Smartphone閒閒哋都賣五千蚊以上，咁大舊錢拎出來的確幾肉痛。有見及此，Ascend P6定價僅$3,280，但廠商沒有將貨就價，內置的是Hi-Silicon K3V2 1.5GHz四核心處理器、2GB RAM及Android 4.2，性價比極高！難得Huawei棄用公版介面，用上自家Emotion UI，不但抽走App Drawer，改把所有程式及Widgets放在首頁，令操作更直接；還提供大量網上介面主題，用戶可免費「單撈」，時刻保持新鮮感！