玩具狂迷 寫真秘笈
唔好睇少香港玩具迷，論狂熱程度分分鐘狼過班「o架仔」，一屋幾百呎有一半面積都係用來擺玩具，仲有唔少狂迷會為自己的寶貝拍寫真。今次小記就同大家講吓影玩具的小技巧，仲邀請咗李小龍客串做Model！我講緊隻Figure咋，係咪好大卡士呢？動漫節就到，一於學番兩招同新Figure「打龍」啦！
Nikon AF-S VR Micro-Nikkor 105mm f/2.8G IF-ED $6,960（b）
Canon EF 100mm f/2.8L Macro IS USM $7,780（a）
電影劇照
拍攝時擺招牌甫士自然好Feel，仲可以睇到隻玩具有幾像真。
電影劇照
盡可能搜集更多資料，並研究電影劇照的拍攝角度和燈光，自然似模似樣。
無論影特寫或者全身都好，燈光係最重要，側光或前側光可勾畫出玩具的層次感和立體感，看起來更似真人。
插入另一隻玩具角色唔單止能夠加強互動性，同時能塑造故事性。
以模仿電影的拍攝手法，從胯下影過去，有一種「冤家路窄」的效果。
唔好以為呢個日落背景係實景，其實只不過係電腦屏幕，開住張JPEG一樣可以好型。
使用實景拍攝就最理想，現時唔少玩具都會附送地台和背景，令氣氛可忠實還原。
微距鏡屬必需品
想玩具表現出真實感，千祈唔好用一般的攝影知識去影，正如我們平時會用50mm、85mm等標準鏡頭，但當你影高達模型、人物Figure時，就要撇除人像拍攝的思維，因為玩具咁細隻，行得太近根本對唔到焦，所以應使用如Canon EF 100mm f/2.8L Macro IS USM、Nikon AF-S VR Micro-Nikkor 105mm f/2.8G IF-ED等微距鏡。不過，微距拍攝會很容易營造出淺景深效果，玩具與背景的分離感會相當明顯，出來的感覺會很假，來得不夠自然；故此拍攝時盡可能收細光圈至F8至F11，以保留相對清晰的背景線條和輪廓。
招牌甫士引發共鳴
唔同影o靚模，影玩具擺咩動作，係由攝影師自己扭。想甫士好睇，首先就要了解手上的玩具角色。例如今次示範的李小龍Figure，拍攝前不妨上網搵相關資料，看看有何招牌、經典動作。此外大家也要注意玩具關節的可動性，千祈唔好夾硬來，玩到斷手斷腳就無謂。除了要有招牌甫士，還要配合取景角度和燈光，不妨以特寫大頭或半身拍攝，再以閃光燈打側光或前側光Lighting，總之令玩具看起來更生動和立體，而且可凸顯玩具的手工。
加入角色玩互動
單一玩具發揮始終有限，因此拍攝時不妨加入相關的角色，以塑造戲劇效果。以李小龍Figure為例，要襯得起佢，梗係要搵隻睇落都打得嘅功夫角色，無理由擺隻Iron Man做對手咁無厘頭吧！當兩隻Figure擺埋一齊，互動性自然更多，並可重現經典對打場面。不過切忌以橫向角度影晒全身，皆因欠缺電影感和無法凸顯主角，相反應以對打角色背向鏡頭作為前景，而對焦點就落在主角身上，並以電影或動畫的角度去取景，會帶出不一樣的效果。
搭建背景講氣氛
影玩具最緊要講求氣氛，能夠營造場景效果，自然會增加相片的可觀性，故拍攝時應選匹配的背景。例如今次影李小龍Figure，便可選擇武館、擂台等真實背景，以突出武鬥氣氛；唔少玩具製造商都會附送紙板背景，令陳列或拍攝時更具真實感。若然你手上隻玩具唔送背景又點算？折衷的方法是善用電腦屏幕，在屏幕中開啟一張合適的圖片托底，又或者將圖片打印出來，而拍攝時應影半身，盡量不要影到腳，以免穿崩。想簡單一點，影Figure時普遍以純黑色卡紙作背景，影模型則大多數會使用灰色卡紙托底，好多玩具生產商都係咁影o架！
查詢：
（a）3191 2333
（b）2907 1122
