論質素，香港嘅Action Figure早已係世界No.1，不過恕我雞蛋裏面挑骨頭，近幾年嚟一直由電影角色做主導，獨沽一味，做得幾靚都咁話。2013終於有驚喜，唔只有由年初Hit到依家嘅NBA熱潮，今屆香港動漫電玩節（簡稱動漫節）仲會爆發另一波嘅足球狂熱，正係早幾日喺旺角大排長龍訂購嘅ZCWO曼聯1:6 Action Figure囉！
2013-14嘅主場新波衫，反領有黑色格仔紋，領下又有紅魔鬼Logo，ZCWO都一一做齊。
球員Number加名字呢啲咁重要嘅細節，當然要做足啦！
頭雕由韓國團隊IMININE負責，老實講，仲有進步空間，不過勝在夠膽做，Simon補充話朗尼（右）本身唔算靚仔，幫佢出頭雕，難免要稍稍修飾、美化，但又要有番真人神髓，呢方面都幾有難度。
EB 1:4 HD系列幪面超人舊一號 $2,488
隨盒附有三對造型手掌及專用地台，雙眼又可發光，可惜頭盔除唔到，見唔到本鄉猛真面目。
戰鬥服用仿皮製成，貼身得嚟又預留活動空間。
腰帶風車識得轉，EB話花咗好多時間先至開發成功。
朗尼嘅Body落齊紋身，包括膊頭嘅英格蘭旗幟，仲有背脊嘅合十手掌加天使翼，翼下有埋大仔阿Kai嘅名字。
素體跟足真人特徵設計，例如朗尼（左）會矮啲、橫啲，傑斯就高少少、瘦少少；後者嘅胸口同前臂仲有毛髮雕刻，美中不足係毛髮塗裝未夠明顯，感覺怪怪哋。
背脊、心口、波Boot及足球都內藏磁石，前者用嚟吸實底座嘅支撐柱，其餘位置就可以擺到自然、逼真嘅控球及射波動作。
特製底台鋪咗仿真草，又可以冚埋印咗隊徽嘅上蓋，即係玩到兩個Look，留意支撐柱除可接駁傳統嘅夾位，亦可改用磁石Parts，Display起嚟自然得多。
除咗主場波衫，隨盒仲會跟埋白色作客嗰套，衫、褲、襪都有齊。
猿創生活限量版12"搪膠Jungle $1,260/個
猿人極地探險隊套裝 $380/套
每隻Jungle送帆布背袋及迷你猿人Figure一隻。
猿人重工拯救隊機械人Double $2,080（白色）/ $1,680（橙色）
EB八周年紀念版Michael Jordan（第二系列）#23黑色作客版蠟像級人偶 $2,188
EB 1/6 Michael Jordan（第一系列）#23白色主場版 $1,998
EB 1/6 LeBron James $1,588
EB 1/6籃球架連球賽時計 $1,380
紅魔鬼隊員陸續有來
事先利益申報，筆者都係曼聯迷，早喺五、六年前開始玩1:6 Action Figure嗰陣，已經好期待有本地品牌會出曼聯Figure，今年終於等到喇，唔感動就假，ZCWO嘅負責人Simon Tsang認為：「我自己都係紅魔鬼粉絲，而且香港咁多曼聯迷，所以我覺得出曼聯Figure有得做，仲希望藉今次機會，吸引一啲冇玩開Action Figure嘅運動迷，都加入呢個行列。」曼聯唔只好波，吸金能力仲特別高，要攞到佢哋嘅License，當然所費不菲，Simon都直言「好貴」，雖然基於商業考量，唔方便透露實際金額，不過計起上嚟，其實成個Project都有投資價值，Simon表示：「朗尼係隊內新一代最具代表性嘅球員，至於傑斯直頭係隊中嘅經典，所以首輪作品就選擇咗佢哋兩位。其實我哋得到嘅License，唔只佢兩個，但凡現役嘅成Team球員，我哋都可以出，第三個就係尹佩斯，安排喺動漫節首度現身，至於里奧費迪南同迪基亞，我哋都想出，如果曼聯簽到法比加斯嘅話，我哋都會考慮o架！」各路紅魔迷，儲定錢喇！
License限制多 素體落功夫
雖然足球員唔似電影角色，周身武器咁多Parts，不過今次嘅曼聯Figure都有齊主、客波衫套裝，仲連波Boot都做到似層層，但係細心睇，點解冇咗Nike嘅Swoosh商標，又冇比賽臂章？原來唔係廠方大意，而係另有苦衷，Simon解畫：「其實我哋都好想做到十全十美，亦都同Nike申請License好多次，不過佢哋相當堅持，講明但凡非Nike自己出嘅產品，一律都唔落得Swoosh，就算我哋有曼聯License都唔例外。至於臂章問題，其實係曼聯方面要求我哋唔好落，根據佢哋嘅講法，曼聯不但踢本土比賽，仲會踢歐聯，無論落任何一款賽事臂章，都好似局限咗，唔夠代表性。」
License問題冇得拗，ZCWO惟有集中精力喺其他方面，就以素體為例，以PVC物料為主，再喺髖關節、膝頭及足踝呢三個關節位加入橡膠物料，加強耐玩性及受力效果，Simon補充說：「Body嘅膝頭只有一道夾口，唔似主流Body嘅分件式組合，因為以足球員嘅裝束嚟講，傳統Body會成個菠蘿蓋現晒出嚟，好礙眼。至於揀衣料都花咗唔少精神、時間，事關唔只要外形、顏色似到足，仲要考慮埋擺大動作甫士時，衣料嘅貼身度、彈性，以至摺痕，都要同現實貼近。」誠意加苦心，紅魔鬼球迷理應收貨，雖然每款300套嘅會場限定版已經訂完，不過各自仲有1,700套大貨版，依家喺旺角兆萬中心嘅「超人玩具」接受訂購，雖則Simon話如果訂唔晒，動漫節場內都會繼續收訂，不過按照早幾日嘅銷情嚟睇，九成九未到動漫節已經沽清，粉絲出手記緊要快！
EB拉打一號首賣
展位：D50-51、53-54
幪面超人嘅Action Figure，多年嚟都係由日本Medicom獨攬，不過耐用度有幾高，相信玩具迷都心中有數，本土勢力Enterbay就成功突圍，從日本攞到昭和年代嘅舊一號License之餘，仲係加大碼嘅1:4，拉打迷仲唔興奮到彈起！為求跟足當年嘅電視劇造型，EB用咗超過一年時間開發，炮製出擁有30個關節嘅全新HD-TDK素體，又以仿皮混合PVC製成戰鬥服，加埋仿皮外套、褲、靴、手套及標誌性嘅紅領巾，做到幾可亂真，而且Gimmick多多，例如複眼內藏LED，腰帶嘅風車機關仲識轉，絕非傳統貼紙咁馬虎！呢款EB舊一號將於動漫節開售，首批屬限量發行，拉打迷記得早啲入場排隊！
猿創作Jungle限量開售
展位：D77
另一著名本地人偶公司「猿創作」，就會派出「猿創生活」嘅形象代言人Jungle參展及開售，全球限量100套，今次動漫節就只分到15套，猿迷必搶！同場仲有白色迷你版猿人極地探險隊套裝及機械人Double發售，前者一套六隻，首度用咗植毛頭，後者則有白、橙雙色之分，全部數量唔多，有買趁手！
同場加映
之前喺上海發售嘅Lebron James及Michael Jordan#23白色主場版，今屆動漫節都會開售，另外訂咗「Michael Jordan Series 2」嘅粉絲，亦可於現場攞貨，後者用咗全新頭雕及黑色23號球衣，跟埋首度發表嘅AJⅠ及ⅩⅢ波鞋，極具收藏價值，官方指屆時可能仲有少量現貨剩，有心人不妨首日入場碰碰運氣！除此之外，仲有1/6籃球架發售，附有計時器可作24秒倒數，相信又會毒死唔少籃球迷！
網址：www.zcwo.com.hk
查詢：2366 2688（超人玩具）
