早前在灣仔工作完畢，忽然想起一間老字號港式西餐廳，我說是西餐廳，不是茶餐廳啊！想起來已十幾、二十年無幫襯過，但為了支持本土文化，即管再去食食吧！

一進入西餐廳便感覺到有點不妥，但還是坐下了；不妥在於整個環境也帶點骯髒，而且非常之嘈吵！顧客之嘈吵，西餐廳方面是控制不了，但四周環境骯髒，地面每行一步都是「黐立立」，他們為何不去清潔一下呢？一間西餐廳竟然同一間三流茶餐廳冇乜分別！算了，希望食物好味，能值回票價啦！點了一個「煙肉雞肉卷晚餐」，結果由個忌廉湯、餐包，到整碟主菜，全部都非常難食！就連茶餐廳的水準也不如！

最後那杯凍奶茶，真係一啖飲完，全杯冰，比茶餐廳還要惡劣！最後埋單盛惠$108元！好了，以後也不用再來。

還記得以前，尤其在80年代，尤其在尖沙咀，好多港式西餐廳，無論由環境到服務，再到食物，統統見得人。好記得小時候常到緬甸臺一間西餐廳，每次也吃炸魚套餐，個夥計次次都叫我：「魚王又來了！」我二哥則被稱為「湯王」；現在自己在家煮，味道可能比外面餐廳還好味。或許要坐時光機才可回味得到昔日港式西餐廳了！