召咸爺歸隊

有碧咸做中場核心發辦，全隊上下踢起嚟都有章法得多，加埋佢場內場外無人能及嘅星味，令三獅兵團唔打得都睇得；咸爺一走，英格蘭就好似冇人孭飛，難怪唔少球迷印英格蘭波衫時，都唔揀現役球員，專登搵番咸爺大名及7號熨字嚟印。今期旺角嘅「No.7」波衫舖唔只返咗新版英格蘭波衫，仲引入原裝正版「BECKHAM」及7號字款，畀各位粉絲自行「重召」偶像歸隊。講開又講，下年咸爺可能會回歸國家隊，不過唔係世界盃，而係12月舉行紀念1914年「聖誕節休戰日」嘅英德友誼賽。