變種狙擊手Canon EF 200-400mm F4L IS USM Extender 1.4×
雖然好多神級攝影師都話「影相唔係靠器材，而係靠創意」，不過俗稱「打雀」的鳥攝題材又另當別論，呢類題材絕對是器材先決，支鏡頭最好有咁長得咁長，先影到雀鳥的全貌。最近Canon就推出了EF 200-400mm F4L IS USM Extender 1.4×長炮鏡頭，佢唔係一支普通的變焦鏡頭，最特別是內置了1.4倍增距功能，無需「接肢」就能夠延伸遠攝能力，啱晒雀友。
防塵防水滴設計的新鏡，配上全天候的EOS-1D X機身，環境再惡劣都應付自如。
$96,800
鏡身旁邊設有一排按鍵，重點是三種防震模式，提供IS 1、IS 2和IS 3應付不同拍攝場合。
可自行選擇對焦距離，以減少對焦走程，間接加快對焦速度。
啪一啪內置的1.4×增距鏡撥桿，鏡頭即時變成280-560mm F5.6，無需換鏡咁麻煩。
鏡頭前端設有長炮必備的對焦鎖定鍵，以便在連續對焦時鎖定對焦位置。
若然要加建濾鏡，鏡頭對應52mm插入式濾鏡，讓拍攝有更多變化。
如果覺得560mm都唔夠用，鏡頭亦兼容EF 1.4×Ⅲ或EF 2×Ⅲ增距鏡，進一步延伸焦距。
試相
使用400mm焦距，既能拍下雀鳥全身，同時可覆蓋四周環境，而且銳利度亦相當高，雀鳥身上的羽毛可逐一細數。
用上了1.4×增距，延長焦距至560mm，雖然最大光圈收細至F5.6，卻能夠特寫雀鳥，令羽翼的色彩層次表露無遺，但又無損成像。
200-400mm 1.4×這新鏡頭早幾年喺大型展覽會上曾經現真身，不過當時被「封印」在玻璃箱內，有得睇冇得試，到最近才宣布正式上架。
內置1.4×增距鏡
以往要延伸焦距，必定要像「接肢」般外建Canon EF 1.4×Ⅲ或EF 2×Ⅲ增距鏡，不過此鏡就唔使咁麻煩，皆因佢屬於變種長炮，天生內置1.4倍增距鏡，啪一啪撥桿就可以令焦距增加1.4倍變成280-560mm，打雀時就更靈活，難怪個價拍得住600mm或800mm鏡頭。
大家都知道，使用增距功能需要付出一定代價，其一就是會收細光圈，由原來的F4光圈降至F5.6；其二就是會減低成像。好彩新鏡的造工上乘，使用前後都冇咩分別。如果覺得560mm唔夠用，你亦可以「接上接」外加增距鏡，不過光圈會進一步收細到F8或F11，用之前記得諗清楚。
四級防震三種模式
用得呢類長炮「打雀」，防震效能是值得關注的問題。今次各位大可放心，因新鏡的IS防震系統支援四級快門補償，而且提供三種防震模式，以應付各種環境，即使手持拍攝都影到實淨的影像，不過小記就唔建議大家手持，因為鏡頭重3,620g，非常墜手。
既然新鏡適用於「打雀」，亦即是所到之處大都是叢林等戶外地方，故此特別以鎂合金物料製造，並用上防塵防水滴設計，配合EOS-1D X機身，萬一影相途中落大雨或者濺上泥濘都不成問題，耐用性和實用性堪稱一絕。此外，新鏡配備了一片大螢石鏡片及四片UD超低色散鏡片，以降低長炮常見的色散問題，並加入獨有的SWC塗膜，有效抑制內反射和鬼影等情況，再加上採用USM環型超聲波馬達，提供寧靜又快速的對焦效果，咁就唔怕對焦聲會嚇走雀鳥。
SPEC
焦距：200-400mm
最近對焦距離：2米
最大放大倍率：0.15×
濾光鏡尺寸：52mm（插入式）
體積：366×128mm
重量：3,620g
查詢：3191 2333
