依家人人都係「低頭族」，搭車、等車，就連食飯都話要玩WhatsApp、Check「面書」。喺香港用手機上網就話咁易，但係去到外地旅行又點搞？查吓Google Maps、打卡都要啩？今勻小記就幫大家搵咗幾個外遊上網嘅方法，臨出發之前不妨精打細算一番。

部分供應商可以網上預先申請，好似日本b-mobile就可以喺機場攞SIM卡或直接寄去酒店，落機就唔使左撲右撲買SIM卡。

唔同國家對呢類「儲值卡」都有唔同嘅稱呼，好似英國Vodafone就叫「Pay as you go」，咪搞錯。

「台灣大哥大」就列明晒收費計算方法，一清二楚夠均真。

香港最大嗰幾間網絡商都有提供數據漫遊日費計劃，不過收費略有分別，而且每間計算一日嘅定義都唔同，有啲係用當地時間計算，各位一定要問清楚。

呢款日本嘅4G Pocket Wi-Fi可以用到四至六小時，建議帶定外置充電器幫佢「補給」！

韓國用嘅Pocket Wi-Fi就完全唔同樣，不過一樣可以同時Share網絡畀幾位朋友。

方法1：當地買SIM 最划算

各地嘅網絡商其實都有出售名為PrePaid SIM或者預付卡，用法同本地嘅儲值卡差唔多，SIM卡提供數據，用完又可以增值。以台灣為例，於桃園國際機場就有賣預付卡嘅專櫃，其中「台灣大哥大」嘅預付卡提供不同日數嘅Day Pass數據計劃，「五日通」就可有五日無限上網及指定通話分鐘，合共只需台幣500元，計番港紙都係百零蚊，玩幾日實在超抵。事實上，小記去過台灣、倫敦、柏林、首爾等地，基本上梗有網絡商賣PrePaid SIM，有啲門市係喺機場、有啲就喺市中心旺區；而且買卡例牌要拎Passport登記，仲要喺手機輸入番正確嘅APN，唔熟手機操作嘅朋友就要諗清楚喇！

抵用程度：★★★★★

易用程度：★

方法2：Daily Pass 24小時任用

大家不時聽到「帳單震撼」，原來係有用家去外國時用咗數據漫遊，所以畀網絡商逐KB咁收錢，月結單自然爆晒額！唔想「出事」，出發前記住睇吓用緊嘅網絡商有冇Daily Pass服務。以3香港為例，用戶只要事前申請「數據漫遊日費計劃」，去到當地再用手機㩒「*107*1#」，收到SMS確認之後，再揀番指定網絡商，就可以24小時內任用數據。要留意，無論用家身處咩國家，每日截數都係以香港時間計算，00:00至23:59為之一日。除中國、澳門外，於其他地方用Daily Pass一律收$168；最正係設定超易，又唔使換卡，而且依家已經覆蓋成108個地區，大家成日去嘅日本、韓國、台灣、泰國都用到，方便！

抵用程度：★★★

易用程度：★★★★★

方法3：租借Pocket Wi-Fi 多人用至啱

唔想去到當地先慢慢Set的話，原來喺香港都可以事先搞掂，皆因市面上都有唔少提供租借漫遊Pocket Wi-Fi連SIM卡嘅服務。就好似「維訊數據VISONDATA」，只要事先經官網或者電話預約，跟手就可以去門市攞機。服務以日費計算。以日本為例，3G服務$70一日，快啲嘅4G服務就$80一日；正在無限數據用量之餘，Pocket Wi-Fi訊號亦可以Share畀幾個同行朋友，除番開費用就抵得多啦！另外，其收費仲好均真，收機日同還機日都唔計錢，不過租借前就要畀低$1,000，而且設有最少租借日數，好似日本就限你最少用四日喇！

抵用程度：★★★★

易用程度：★★★