大廠足料揀手雙卡

以前雙卡手機可以話係國產嘅專利，鬥價錢贏晒，不過講質素就冇擔保。近年反而勁多大廠轉玩雙卡手機，皆因用戶群愈來愈大，除咗成日北上嘅中港客之外，就連出門外遊都啱用，旅行時一機兩SIM勁就手。適逢七月暑假呢個旅遊旺季，各大廠商梗係食住條水，好似HTC就有部Desire 600，Samsung都出部Galaxy Core，靚仔功能足，仲要有大牌子照住，絕對玩得過！

白色主機撞色超靚，感覺仲幾高貴添！

機背鏡頭達800萬像素，日光下成像不俗。

機背有微微弧度，手感唔錯。

BlinkFeed可以喺一版睇晒社交網絡同埋新聞，好方便。

新版四核心處理器行Benchmark得分唔高，不過用落尚算流暢。

撥號介面設有兩個撥號鍵，唔驚撳錯。

「雙網絡管理員」可以設定嘅功能唔多，連Icon顏色都冇得換。

內置省電功能，電腦識得自動節省CPU使用量及調低屏幕亮度。

BoomSound雙前置喇叭特別改用紅色，搶眼到爆。

雙卡槽均採用彈簧設計，更支援熱插拔。

內置拍攝濾鏡，仲可以即時預覽。

試睇YouTube HQ影片，屏幕顏色自然，對比亦相當高。

採用4.3吋屏幕，不過就冇用上招牌嘅AMOLED素材，色彩冇咁鮮艷。

機背殼加入格紋，頗有心思。

兩個卡槽左右分開，換SIM卡後亦一定要重新開機。

500萬像素鏡頭規格一般，對焦速度亦唔算快。

採用自家介面，最多支援七版主頁。

拉低Status Bar就可以即時換主卡，超就手。

「SIM卡管理員」可以設定數據等功能嘅預設主卡，而且可以幫SIM卡更換圖示。

同樣設有兩個撥號鍵，包保唔會搞錯。

支援Smart Stay功能，前鏡頭可以辨認雙眼焦點而自動熄芒，睇睇下eBook瞓咗都唔驚屏幕長開嘥電。

拍攝模式齊全，全景、一笑即拍、卡通效果都一應俱全。

Acer E2-V370 $2,398（c）

Akai A380 $2,280（d）

Desire 600 高貴靚樣

坦白講，以往雙卡機向來唔多受大廠重視，好多機嘅設計仲勁求其。反觀今次HTC Desire 600就夠晒誠意，其簡約面板及幼邊框設計，再加上弧面機背，手感都幾好。最突出就係機身採用白色為主色，正面外邊則加入銀色拉絲邊框，而4.5吋qHD芒旁內邊則用上紅色幼邊作點綴，搶眼之餘仲有貴價機嘅風範！呢條紅色邊仲大有來頭，實情係一對BoomSound雙前置喇叭，聽歌、睇YouTube都可以用埋Beats Audio音效，音質自然超班。

至新介面

雖然HTC唔係成日出雙卡機，不過此機嘅雙卡功能都算齊全。除狀態欄會顯示雙卡網絡及接收外，亦內置「雙網絡管理員」，可為SIM卡命名，同時可以設定優先使用的SIM卡，使用上都好清晰。值得一提，新機換上了專為入門而設嘅Qualcomm Snapdragon 200 1.2GHz四核心處理器，配合Android 4.1作業系統，操作好流暢。介面方面，搭載最新HTC Sense 5.0，新功能有整合Facebook、新聞等資訊嘅BlinkFeed主頁，以及將相片自動轉化成30秒短片嘅Video Highlights，都算足料。

SPEC

制式： GSM三頻 UMTS 900/2,100

處理器： 1.2GHz四核心

記憶體： 1GB RAM、8GB內存；支援microSD

屏幕： 4.5吋（960×540解像度）

鏡頭： 800萬像素

對外連接： 7.2Mbps HSDPA、 NFC、Wi-Fi N、 microUSB、藍芽4.0

電池容量： 1,860mAh

作業系統： Android 4.1

體積： 134.8×67×9.26mm

重量： 130g

Galaxy Core 縮水S3

而另一邊廂雙卡代表就有韓廠Samsung，新作Galaxy Core睇外形的確驚喜欠奉，繼續採用一貫Samsung機嘅圓角弧邊風格；不過除大路嘅白色之外，仲追加深藍配色，機身、邊框又用上拋光處理，整體效果都幾靚，感覺就有啲似縮水版S3。另外，內置1.2GHz雙核心處理器以及1GB RAM雖屬入門規格，但勝在引入高階機嘅特色功能，包括前鏡頭辨識雙眼焦點而自動熄芒嘅Smart Stay，以及語音開啟Wi-Fi及鬧鐘等功能嘅S Voice，十分實用。

速換雙卡

而講到雙卡功能，早前已推出多部雙卡機嘅Samsung經驗當然豐富！今次新機兩張SIM卡都同時支援GSM及3G，而且一拉低狀態欄就有專用圖示即時切換主卡，超方便。此外，「SIM卡管理員」則可以設定SIM卡名稱及圖示，確保唔會混淆；最就手就係支援名為「Dual SIM Always On」功能，可以自動將兩張SIM卡互相飛線，就算一張SIM收唔到都有第二張SIM即時頂上，以後就唔驚再有Miss Call啦！