三路發功 PUMA球球是道

雖然歐洲四大聯賽仲抖緊暑，不過足球熱潮唔多覺有Cool Down過，球星轉會新聞未停過之餘，下個禮拜仲有曼城、熱刺及新特蘭訪港參加「巴克萊亞洲錦標賽2013」，邊個話暑假就冇好波睇？PUMA HK就食正足球熱，今期一口氣推出三大王牌鞋款—evoSPEED 1.2 FG、PowerCat 1 FG及King FG，好似曼城嘅阿古路（Sergio Aguero）及基捷基治（Gael Clichy）就係evoSPEED 1.2 FG嘅用家，若然佢哋隨隊來港獻技，到時球迷就要落足眼力，睇清楚人同Boot有幾合拍喇！

PUMA evoSPEED 1.2 FG $1,299

阿古路（Sergio Aguero）

PUMA PowerCat 1 FG $1,499

萊斯（Marco Reus）

PUMA King FG $1,699

丹迪（Dante Bonfim Costa Santos）

12粒圓釘都屬於Speedtrack設計，而且外底用埋Duoflex技術，集穩定性與靈活性於一身。

鞋頭嘅水滴形微粒，喺雨戰時可以發揮防滑能力。

鞋籠加設EverFit組件，藉此加強貼腳效果。

鞋墊前後都落足Pad位，發揮緩震作用。

出於射門及長傳需要，PowerCat 1所有鞋釘都用刀片形設計，馬步穩先至射或傳得準嘛！

鞋頭內側用咗3D PST DUO設計，有效加強射或傳波時嘅力度與準確度。

鞋釘混合咗方形及圓形兩種設計，兼具靈活性及抓地力。

鞋頭披上柔軟嘅牛皮，又有縫線定位，唔怕走樣變形。

evoSPEED輕身快放

阿古路及基捷基治都屬於高速型球員，負重愈少、速度優勢自然愈高，所以evoSPEED 1.2就以輕量化為設計大方向，鞋面以薄身、輕巧嘅人造物料製成，整個面層都力求平滑，刪除一切不必要嘅物料，力求輕得1g得1g。不過鞋面薄成咁、又係人造物料，會唔會犧牲咗穩定性及貼腳效果？PUMA就喺鞋籠補強，加設一層EverFit物料，令以上問題迎刃而解。除此之外，由鞋舌、踭位以至鞋領都加有墊位，避免因鞋身太薄而令腳背、足踝及腳踭承受過多壓力。另一特色設計係鞋頭貼滿透明嘅圓點，唔係裝飾咁簡單，原來係專為雨戰而設，可以加強鞋頭與足球嘅摩擦效果，藉此減少因鞋面積水而出現控甩腳嘅情況。

星級用家：

阿古路（Sergio Aguero）

evoSPEED系列嘅頭號代言人，不經不覺evoSPEED 1.2 FG已經係佢第三款標榜速度型嘅PUMA波Boot，但願佢喺下個禮拜嘅訪港比賽唔會甩底，畀機會香港球迷近距離見識佢同evoSPEED「人Boot合一」有幾快！

PowerCat力貫千鈞

踢足球，跑得快唔係大晒，否則嘅話搵晒啲百米飛人做球員就得啦！傳球、射門嘅準確度，就同速度一樣重要，所以PUMA設計咗另一個波Boot系列PowerCat 1，鞋面大部分用軟身嘅K-Leather製成，帶嚟實在球感之餘，仲喺經常用嚟斬波、射波嘅鞋頭內側位置，設計成3D PST DUO區域，利用橫間板塊令鞋面與足球接觸時發揮「導向」作用，令長傳或射門做到更有力、更準確，最啱鍾意開角球、死球嘅球員使用。另一方面，鞋面兩側就用咗超輕嘅人工微細纖維加固，以最輕量化嘅方法加強對腳掌中段嘅支撐效果，加埋踭位嘅罩形組件，可見PowerCat 1強調攻擊力之餘，對用家亦做足保護措施。

星級用家：

萊斯（Marco Reus）

唔只係德國隊嘅超新星，仲喺上季為多蒙特獻上多個絕殺入球，同佢拍檔嘅PowerCat應記一功。

PUMA King FG王者之選皮氣大

今時今日嘅波Boot日新月異，尤其是為咗追求輕量化，鞋面改用人工物料製成嘅例子亦愈嚟愈多，不過對傳統嘅用家嚟講，始終都係真皮波Boot先啱口味，事關由球感、舒適性到保護性，真皮嘅質感總係秤先啲。PUMA King系列由面世至今一直堅持真皮製作，今代都唔例外，鞋頭伸延到鞋帶區，以至鞋面外側都係用小牛皮製成，超柔軟嘅質感，能夠緊貼腳形嘅弧線變化，減少因鞋面唔夠軟身而與腳掌之間造成嘅空隙，球感自然實在得多。加上真皮有一定厚度，無論耐用性與保護性都令人放心啲之餘，PUMA King嘅踭位仲有罩形組件加固，針對性地加強保護性及穩定性。