首試Ouya 的骰Android遊戲主機
Android除可用於智能手機、平板電腦、數碼相機、電視機頂盒之外，原來遊戲主機都一樣得。被譽為今年其中一件令人期待的科技產品─首部Android遊戲主機Ouya，終於在日前抵港，其機身的骰，可用HDMI線連接大電視玩Android遊戲，唔使再屈就手機上面玩！到底這部開價唔使一千蚊的新一代遊戲主機得唔得？就等小記試畀大家睇！
$980
唔止打機，大家仲可以喺Ouya下載開發套裝ODK自己開發遊戲。
支援四個手掣，可用原裝手掣外，實試接上Xbox 360同PS3手掣都一樣用得到。
Ouya手掣的手握位及按鈕編排都做得幾好，手感不俗；如想買多個手掣，網上標價要成49.99美元，有啲貴囉！
HDMI、USB、LAN到電源接口等全部介面接口皆設在機背位置。
手掣採用左右各一枚AAA電池驅動，拆開面蓋就能換電；值得留意係右方四顆功能鍵分別標成「O」、「U」、「Y」、「A」，夠噱頭。
Ouya目前不能接通Google Play，要從自家Game Store下載Android遊戲，好在選擇都唔算少，截稿時已有220款遊戲。
每款Ouya對應遊戲都有得試玩，試到啱先畀錢買完全版都未遲，就如《ShadowGun》完全版亦只是4.99美元，跟Google Play同價。
Ouya強調易裝易拆，只要用普通螺絲批就可以拆開機底。
Ouya必裝遊戲
《TowerFall》畫面一般，但策略性方面做得唔錯，唔少評論都話佢係暫時Ouya的最佳獨佔遊戲。
《Final Fantasy III》都唔使點多介紹，RPG迷一定不可錯過，高清畫面表現都幾理想。
《ShadowGun》感覺都幾似《Gears of War》，畫面表現比想像中理想，玩落都幾刺激，只係畫面格數唔夠，流暢度爭少少。
普通版Ouya在eBay上都只係炒貴少少。
啡色特別版在eBay價由二百幾到三百幾美元都有，想買可上去碰吓運氣。
上月台北電腦展時，Showgirl拎住部Nvidia Shield周圍畀人試，小記試過都覺得好爽！
即使Nvidia Shield最新定價為299美元，但仍比PS Vita貴；至於實際銷量如何，要等今個月內正式推出才有分曉。
Nyko PlayPad Pro設計接近Xbox 360無線手掣，手感唔錯，但便攜性一般。
PlayPad提供埋便攜盒，可收納手掣、USB接線同摺合式手機支撐架。
Nyko PlayPad款式較輕巧，並附上保護盒和手機支撐架。 $299
支援好多Android遊戲之餘，連模擬器都可以玩。
兩款Nyko Android手掣都要對應Nyko Playground應用程式使用。
網上籌得800萬美元開發
要將Ouya的規模跟Microsoft、Sony或Nintendo相比，實在有太大的差距，但Ouya成立過程都幾傳奇。話說去年七月，遊戲機設計師製成Ouya試作機後，在Kickstarter網站向網民集資開發及生產，原本諗住籌95萬美元，點知幾個鐘頭就湊夠數，最後更超額完成，籌得超過800萬美元，因而好順利地推出了這款市場上首部Android遊戲主機。至於零售版在今年六月底正式推出，香港Game舖入貨都唔算遲。
講番Ouya主機規格其實只係好一般，僅用上Tegra 3處理器，不過玩Android遊戲又實在唔需要有好強的硬件規格；最抵讚係主機「四方果」機身設計簡約得嚟又唔會太玩具Feel，而無線手掣都算造得不俗，手感都幾好，用上兩枚AAA電池驅動，要挑剔只係唔識震而已！
只限玩220款對應遊戲
惟要留意Ouya暫時用唔到Google Play，要進入Ouya自家Game Store先可下載各款對應的Android遊戲，截稿時就已有220款遊戲可玩，比較出名有角色扮演遊戲《Final Fantasy III》同射擊遊戲《ShadowGun》，仲有少量係Ouya獨佔Android遊戲，但想玩《Puzzle and Dragons》、《Angry Birds》或者《Candy Crush Saga》就暫時未有！Ouya有樣好，就係唔使畀錢都有得玩，佢強調「Every Game is Free to Try」，即係隻隻遊戲唔使錢都有得試玩，試玩過覺得啱先畀錢買！首次開機時要登記用家的資料，亦要填寫信用卡資料，香港發行的信用卡都用得，至於付款買遊戲則可以用信用卡、預付卡或推廣卡，但對香港用家而言，睇嚟只有信用卡一項選擇。
開放平台供自製遊戲
筆者試用Ouya玩《Final Fantasy III》同《ShadowGun》兩款遊戲，運行方面都算錯，只係《ShadowGun》每秒格數略嫌唔夠，但在高清輸出下，畫面表現都幾有水準；至於Ouya獨佔Android遊戲《TowerFall》畫面好有8-bit時代的懷舊風格，都幾考腦筋，網上唔少評論都話佢係現時Ouya最佳遊戲！至於遊戲收費方面，其實跟Google Play分別不大，購買完全版的話，《FFIII》要15.99美元，而《ShadowGun》只係4.99美元。
覺得Ouya遊戲選擇太少？玩家仲可以下載Ouya Development Kit自己開發遊戲，由於Ouya係開放式平台，唔使畀License費用都可成為Game Designer！Ouya唔止可以玩Game同設計遊戲，跟機預載咗Twitch.tv、VEVO、iheartradio、XBMC同Plex等娛樂資訊應用程式，官網仲話嚟緊會有更多大公司加入，前景都應該唔差！
啡色特別版 炒高兩至三倍
Ouya主要以網購形式銷售，在美國本土以外，主要都係靠Amazon銷售；加拿大Amazon或者英國Amazon都係標價99.99，不過前者係99.99加元，後者就99.99英鎊，即係近$1,200港紙，都幾貴，而且暫時缺貨！至於上eBay等其他用家放機都得，但要捱少少炒價，好似普通版最高都係炒到150美元，唔算誇張；反而最初預留畀捐錢開發Ouya的Kickstarter網友的啡色特別版就炒得起，因為啡色限量版不作公開發售，普遍叫價都去到二百幾三百美元，即係原價兩至三倍！
SPEC
處理器：Nvidia Tegra 3
記憶體：1GB
儲存容量：8GB
操作系統：Android 4.1 Jelly Bean
影像輸出：HDMI
體積：75×75×82mm
重量：300g
其他對手：Nvidia Shield 手提機未出先劈價
各位可能都對另一部摺合式Android手提遊戲機Nvidia Shield有啲印象，佢由今年一月CES正式發布以來，就先後喺幾個大型展覽上曝光，如上月台北電腦展就有女模拎住周圍叫人玩，小記試玩過隻賽車遊戲都覺得幾爽！此機配備四核Tegra 4處理器及5吋高清芒，機能確實幾強，但似乎最大阻力來自定價，最初開價349美元，仲貴過PS Vita。6月27日、即預定發售日的一星期前突然劈價至299美元，不過似乎預售反應都只係一般！於是就將正式推出日期延至七月底，唔知對銷情有冇幫助呢？不過有啲網友話，既然要拎出街玩Android遊戲，用手機直接玩仲實際。
至抵打機方案 Android手機遊戲手掣
想方便地玩Android遊戲，而又覺得買部Ouya或Nvidia Shield唔划算的話，買個Android遊戲手掣配部Android手機都係一個拆衷的辦法。專出遊戲配件的Nyko最近就出咗兩款Android手掣PlayPad Pro同PlayPad，只需在Android手機及平板上先安裝Nyko Playground應用程式，就可搵出機內支援到手掣的Android遊戲，經過簡單設定就可以玩！好多Android遊戲或者模擬器都對應得到，始終玩動作遊戲都係用手掣較舒服！兩隻手掣的分別在於PlayPad Pro較大Size，似Xbox 360手掣，手感較好；而PlayPad體積較細，但提供便攜盒及手機支撐架，方便帶出街玩。兩款Android遊戲手掣售價唔使$300，都合理！
查詢：2359 7998
