紅軍新戰衣傳承1984

雖然「紅軍」利物浦嘅國內頂級聯賽奪冠數目（18次），已經畀曼聯嘅20次超前，不過五次贏到歐聯嘅成績，依然喺英倫三島首屈一指，反觀曼聯只有三次，令一眾「紅魔鬼」粉絲恨得牙癢癢。既然歐戰成績咁標青，嚟緊嘅2013-14紅軍主場新球衣，一於向光輝歲月取經，以1984年嘅款式為藍本，即使贊助品牌已經由Umbro變咗Warrior，不過領口及衫袖設計就一脈相承，希望可以幫紅軍喺新球季谷起士氣！

1984年嘅紅軍主場波衫，領口及衫袖嘅紅白間設計，可謂深入民心。

利物浦2013-14 主場短袖球衣 $539

衫身主要物料係War Tech布料，藉透氣度高保持通爽效果。

領口背後嘅金色繡花，表明球會永遠唔會忘記喺希斯堡犧牲嘅96位球迷。

領口以及衫袖嘅紅白間位，既向1984年嘅紅軍前輩致敬，當中嘅透氣網層更兼顧功能需要。

主場波衫已經有得買，至於作客款式亦已設計好，將於稍後日子抵港，紅軍粉絲記緊留意。

除咗利物浦，Warrior亦成為西甲嘅西維爾球衣供應商，相關波衫亦有望輸港。

Liver Bird隊徽屬於2012年嘅新設計，造型簡潔更易入腦。

衫身正面布滿直間暗花，內有球會名字及吉祥物Liver Bird。

腋下衣料與衫身正面有所不同，彈性與排汗能力更加突出。

被外界一致睇好嘅超新星湯馬士恩斯，係Warrior喺足球壇部署長遠發展嘅生招牌。

品牌最新推出嘅Gambler Pro，係湯馬士恩斯嘅專用鞋款。

神奇隊長力撐

紅軍主場新波衫已經抵港上架，設計主題係「Rise Up LFC」，以1984年嗰件為藍本，當年紅軍有幾威？甲組聯賽、聯賽盃同歐洲冠軍球會盃（今日歐聯前身）三項錦標到手，首度成為三冠王！當年件波衫特徵，就係領口及衫袖用咗紅白相間，如今重現於2013-14嘅新波衫身上，不過面積就有所收斂，以免搶咗衫身主色嘅風頭。除此之外，紅白間位唔係漂染就算，細心啲就會睇到用咗透氣網層，而且彈性高，着起上嚟一定舒服過1984年嗰款。紅軍隊長謝拉特（Gerrard）就對新波衫如此評價：「呢件新衫令我哋記番起球會五次捧走歐聯冠軍嘅快樂回憶……作為一支團隊，我哋當然希望幫球隊重拾昔日光輝。」

War-Tech功能交足貨

細節設計點只紅白間位，其實衫身正面布滿直間暗花，內有Liverpool FC嘅字樣，以及球會吉祥物Liver Bird；至於上一款利物浦波衫領口背後，繡上雙火炬連「96」字樣嘅設計，新波衫亦都沿用下去，藉此紀念1989年希斯堡事件中喪生嘅96位紅軍球迷。用料方面，就採用品牌獨有嘅War-Tech布料製成，備有透氣度高、排汗快嘅優點，尤其是腋下同背脊呢啲最易出汗嘅位置，用咗四向彈性嘅網狀纖維，乾爽程度特別高。

超新星加盟

作為足球界嘅新丁，Warrior唔只積極爭取同大球會合作，仲密密簽咗唔少歐洲球星做代言人，從多方面打響知名度，當中包括愛華頓嘅費蘭尼（Fellaini）、紐卡素嘅古迪利斯（Gutierrez），以及最新加盟嘅黑池中場、英格蘭U21國腳湯馬士恩斯（Thomas Christopher Ince），後者正正係前英格蘭及利物浦名宿保羅恩斯（Paul Ince）嘅愛子，入選2012-13年度嘅英冠PFA最佳陣容，並且獲得本年度英格蘭足球聯賽最佳青年球員嘅殊榮。睇嚟Warrior就同好多大球會買人一樣，對年輕嘅「潛力股」分外另眼相看，為品牌形象作長線發展。