自家製微微微電影《Instagram》

《Instagram》是為人熟悉的影相App，簡單的三個步驟，影相、加特效和Share成為了其爆紅的元素，而《Instagram》最近仲新增了拍片功能，等大家唔淨只Upload靜態畫面，連會郁的動態近況都能Share畀人睇，而每段片的長度為3秒至15秒。不過，唔好以為新加入的拍片功能冇咩特別，只要你識得玩，熟習當中的操作，製作一段「微微微」電影簡直就係Easy Job。

四方1比1長寬比的特點係構圖唔受局限，主體可任意擺位，擺中間都仲得，夠晒Freestyle。

拍片時需要長按拍片鍵，而放手就代表結束，以多段小節整合出最長15秒的短片，無需剪片就可以玩分鏡。如發覺上一小節唔合心水，大可剷走丟入垃圾桶再拍過。

入面的Effect有13種，其實已經好夠玩，而成條片只可以用一個Tone。

畫面中間可選擇防震和震動效果，震動就會Wide少少同震少少，出來的感覺似Hand Held咁有Raw味。

選擇短片的其中一格做封面，以吸引班好友Click入去睇。

最後加句短片說明和地點，就可以上載到社交網站同朋友分享。

妙用拍片鍵實例

正方度Freestyle構圖

現時的電視、電影拍攝，基本上都轉晒做720高清或1,080全高清，亦即係用緊16比9的長寬比例，雖則Fit晒人眼的可視角度，但構圖就非常講究和嚴謹，少啲功力都拍唔掂。而《Instagram》引人入勝的地方係用上1比1的長寬比例，換言之即係正方度。正方度的優點是構圖自由，不受限制，無論主體擺正中間或者上下左右任何一個位置，都唔覺礙眼，仲可以用埋前置鏡頭玩自拍，拍片都能夠Freestyle，就算未讀過電影都輕易拍出有水準的短片。

長按操作玩分鏡

今次《Instagram》跟一般手機拍片不同的之處，在於拍片時需要長按拍片鍵、放手就結束，而唔係按一吓開始、再按一吓結束。可能你會覺得長按咪好攰，兼不夠靈活？其實咁樣的操作係有玄機，因為長按和放手呢兩個動作，係為方便用家玩分鏡，放手後可以轉換場景再長按接續，以多段章節湊合出一段最長15秒的短片。若然大家認真拍片，事前就最好諗定每個分鏡，如果大家唔滿意上一小節，仲可以丟棄至垃圾桶，等你可以NG拍過嗰一段。

選擇封面引人睇

基本上揀完Effect和震動，短片的工序大致上完成，然後就係要選擇封面。你可能會問咩係選擇封面？亦即是從短片中揀選當中的一格，然後就係靠嗰一格去吸引人睇段片，道理就好似有啲荷里活大片張Poster型到震，點知睇戲卻完全係另一回事，總之吸引到人去睇就已經贏咗一半。最後的步驟就係打埋句Caption，同埋透過GPS為條片加入坐標和地點，咁就可以Share到Facebook、Twitter、微博等社交網站。

加Effect創意無限

《Instagram》最好玩係將一張平平無奇的相片，變為一張人人Like爆的佳作，咁神奇皆因內裏有成19種Effect畀你任玩、任加，不過新增的拍片功能就冇咁多種Effect畀你揀，只有13種，但都已經足夠大家發揮創意。短片仲可以揀防震和震動兩種效果，顧名思義防震的畫面會定少少，出來的效果電影感較強；至於震動亦即係冇防震，感覺就會似手搖拍攝，但要注意此效果不適用於前置鏡頭。若然大家細心觀察，不難發現震動效果的畫面會比較Wide，原因係要預留部分空間畀防震Crop畫面。

妙用拍片鍵實例

其實長按鍵拍片、放手暫停呢個功能，除了可玩分鏡及剪走唔理想的片段外，只要加點想像力，就可以玩到好多過癮嘢，例如外國足球用品網站Soccerbible的《Instagram》官方帳號，就有段巧妙利用按鍵和放手的短片，將歷代Predator猶如魔術表演般逐對變出來！想睇就追蹤@soccerbible喇。