醒目變靚 Honda Jazz Modulo Package

Honda Jazz Modulo Package

人嘅樣貌係與生俱來，想靚啲可以靠化妝，甚至整容，其實汽車都可以後天加工，只要加番套靚包圍，成個Look都會唔同晒，正如本田（Honda）最近為Jazz加裝Modulo Package，鬼面罩欄柵及車身擾流套件都換上運動化式樣，同步追加埋頂置尾翼，當堂變得殺氣騰騰，驟眼睇仲以為係全新車系。

Honda Jazz Modulo Package

Modulo Package嘅賣相更趨年輕化，相信有助Jazz進一步開拓後生仔市場。

車尾裝咗頂置大尾翼，造型夠晒霸氣。

原廠用咗15"輪圈，輪胎尺碼為175/65 R15。

前擾流器線條充滿肌肉感，又整合埋霧燈，分量十足。

側鏡加上指揮燈已經係大趨勢，有助提升行車安全。

1.3L直四i-VTEC可輸出100ps馬力，而且耗油量低，自然大得民心。

軚環用咗真皮包裹，並可作多角度調校，而且有埋音響鍵，揀歌、控制音量，雙手都毋須離軚。

座椅軟硬度適中，而且有唔錯嘅承托力。

車頂設有巨型天幕，晚上揸車去睇星就最啱。

後座可以60:40嘅比例向前放平，可以靈活改變載人與置物比例。

Jazz向來有唔少後生仔支持，除咗車廂闊落又慳油，最得民心係有副型格賣相。今次代理引入嘅Modulo空氣動力學套件，當中包括鬼面罩欄柵、裙腳、頂置尾翼以及頭尾擾流，進一步凸出Jazz嘅動感化形象。

高低轉各有所長

無論今代或者上一代，Jazz嘅易手價都企得好硬，其慳油、實用嘅特性，係打入唔同年齡消費群嘅殺着。今代Jazz就將品牌嘅Less Fuel．More Power理念推至極致，1.3L i-VTEC環保引擎既有100ps馬力，配合自家Drive-by-wire（DBW）系統，以及新研發嘅「1氣門休止VTEC」技術，具備「低轉高扭力、高轉大馬力」嘅優點，而且根據日本JC08模式測試，搭載無段變速自動波箱嘅Jazz 1.3，綜合耗油量可低至20.9km/L，同時符合本地環保汽油私家車稅務寬減計劃。

車廂空間超想像

揸Jazz嘅感覺確係好爽，100ps馬力對細車嚟講已經好夠用，試車時載咗三個人，駛上斜路依然不愁乏力，甚至比起唔少排氣量更大嘅車款仲好爆。底盤調校亦都抵讚，前麥花臣、後扭力桿唔只顧及乘坐舒適性，懸掛又不會太腍，拐彎時唔似得部分房車咁大幅側埋一邊。咪以為車仔細細，內籠唔慌大得去邊，咁樣諗Jazz就錯晒，唔信可以到陳列室試一試，車內空間出奇地寬敞，腳部又有充足嘅伸展空間，拍得住1.5L以上車款。一如市場上嘅多款Hatchback，Jazz嘅後座都可以收起，加埋品牌獨有嘅ULT座位編排，輕輕一拉就可以放平，就連後座底部嘅墊褥都可摺起，方便擺放高身行李。作為稱職嘅家庭車，安全性當然不容忽視，廠方特別為Jazz準備咗同級獨有嘅四輪碟式制動系統，車架又用埋G-CON力學設計，夠晒周全。