100km長征 Note慳到你笑

燃油價格持續高企，唔少消費者揀車時，都會將耗油表現列為首要考慮，但數字是始終不及實試令人信服。最近日產（Nissan）就搞咗個Note慳油比賽，設計咗一段100km長嘅路線，畀車主及傳媒做慳油測試，結果勝出嘅參賽者做出34.46km/L成績，比起廠方公布嘅24km/L仲要少43%，證明事實比數據還理想，若果以現時油價$16.71/L計算，每公里嘅燃油成本只係$0.48，慳到令人笑出聲！

100km長征 Note慳到你笑

比賽全程長達100km，途中經過唔少燈位，係增加耗油量嘅高危位置。

參加者出發前先聽個簡介會，了解比賽規則及路線。

每位參加者都獲派一張路線圖，減少走錯路嘅機會。

出發前先到油站「打爆」油缸，並由工作人員記錄里數。

余先生（右）以34.46km/L嘅成績成為冠軍，比廠方公布嘅綜合數值仲要少43%。

後座腿部空間相當闊落，勝過唔少中型房車。

啟用「ECO」行車模式，就可以進一步減少耗油量。

1.2L直三超級增壓引擎馬力達98ps，足以應付本港嘅路面需要。

合誠汽車舉辦嘅「低油耗‧大空間日產Note慳油大比拼」，有14名車主及傳媒參加，路線由九龍灣出發前往赤鱲角機場，途中要到西貢西沙及屯門青山灣嘅檢查站登記，喺新界兜一個大圈，全程約100km，指定要喺兩小時內完成，冇得歎慢板。活動當日，朝早十點半起陸續出車，結果所有參加者都可以喺指定時間內抵達終點，而四個月前先成為Note車主嘅余先生，就以34.46km/L成為冠軍，賽後他坦言全程都冇開冷氣，又冇畀大油，一路慢慢順住去，上斜都唔超過2,000rpm，難怪慳得咁緊要啦！至於排第二及第三名嘅參加者，就分別做出33.16km/L及31.66km/L嘅成績，兩者都比廠方嘅公布數值仲要慳。

實試34.46km/L慳到盡

雖然Note向來標榜慳油，不過事前相信冇乜人會相信，可以喺本港路面做到34.46km/L嘅成績，即使比賽路線有近九成係公路，但剩餘嘅市區路段有唔少燈位，經常開開停停，都做到$0.48/km呢個超低油費數值，真係要寫個「服」字！至於本港出售嘅Note DIG-S，搭載咗1.2L直三超級增壓引擎，同時導入智能停車熄匙系統，比賽期間停過唔少燈位，引擎差唔多每次都會自動熄咗，期間一滴油都唔使用，但係冷氣就照常運作，只要稍稍鬆開制動腳掣，引擎又會自動重新點火，整個過程都唔會為駕駛者感到遲滯麻煩。活動結束後，筆者由機場揸Note返九龍灣，全程都冇用節油方式行車，行到北大嶼山公路一段，仲將車速提升至110km/h，到達目的地再查看平均耗油量，都只係20km/L，不愧為慳油王！

置物量大實用性高

Note唔只標榜低耗油，仲強調「大空間」，佢嘅車廂總長度達到2,065mm，後座乘客嘅腿部伸展空間甚至可以媲美中型房車，唔信嘅話大可親自到Showroom睇睇，便可以親身感受到。除此之外，車門嘅開啟角度接近直角嘅85°，車內又有大量儲物空間、行李箱容積就高達330L，無論實用性及方便度都非常有水準。目前Note DIG-S已獲政府認可為環保汽油私家車，可享45%汽車首次登記稅優惠，車價為$176,800起，性價比之高顯而易見。