一到夏天，少不免會去海灘同船P；最可惜手機向來不宜近水，想隨手影吓Snapshot都唔得，確實無癮！唔使愁，近期唔少廠商都推出防水配件，簡單裝上iPhone就會搖身一變成深潛神器，水底影魚仔都難佢唔倒！

各$990（a）
機背玩碳纖紋，加埋鏡頭凸出設計，好Man！

雖然唔支援篤芒，不過按鍵位置Fit晒相機功能。

左側設有腳架專用嘅金屬螺絲孔，可以輕鬆接駁腳架。

各$780（a）
機殼分上下兩部分，裝殼後鏡頭不被遮擋。

機面設有特製膠膜，篤芒反應依舊好爽。

金屬鉸位好實淨，不過想打開就要用啲力。

機殼底部可以打開，方便充電，不過落水前記得關好。

$1,999（b）
Ego727勁的骰，加埋底座都仍然好輕便。

裝上防水保護殼後，Cam仔即時可以深潛40米。$328（b）

揭開機側保護蓋就會見到記憶卡及USB插口。

i-Pix A5 56米深潛

第一眼見到呢款i-DiveSite i-Pix A5確實覺得誇張，不規則設計加上半透明面蓋，的確似潛水面罩。呢款iPhone 5有防水機殼，特意採用密封式設計，接口位置有防水膠邊，就算潛落56米水底都唔會入水！雖然手機裝上機殼之後唔可以篤芒操作，不過機殼正面就備有五個銀色實體按鍵，按鍵位置啱啱好可以畀你（手禁）到快門鍵、Home鍵等；如果配合專用App《DiveCam》的話，更可以做埋熄芒、拍片等操作，水底攝影就最啱使！值得一提，機殼有腳架專用螺絲孔，夾埋潛水燈等架生，拍攝效果肯定更好；嫌玩味唔夠，仲可以另配廣角或微距鏡，擴充性極強！

iPhone 5 Armor Series 輕型三防

如果唔會玩潛水咁大陣仗，都仲有「輕量級」防水機殼畀你揀。呢款由美國品牌OtterBox推出嘅iPhone 5機殼，論潛水就冇i-Pix A5咁勁，不過都可以於2米水深玩到30分鐘，去海灘整濕身或跌落水都冇問題。機殼堅在防水之餘，仲通過美國軍事標準，可以抵受3米高跌落以及2噸撞擊，任你玩到幾激都傷佢唔到。最難得係機殼咁硬淨，但外觀仍唔算笨重，仲有淺藍、橙、青三隻色揀，加上裝住機殼都照舊可以篤芒操作；另外底部更設有蓋掩，要充電都唔使成個機殼拆甩，都夠方便。

網址：www.otterbox.com.hk

同場加映

Ego727 的骰Cam仔

如果鍾意玩戶外運動的話，不妨留意埋美國品牌Liquid Image新推出嘅運動攝影機Ego727。呢款Cam仔設計的骰，仲細過一樽益力多，方便隨身攜帶。佢仲可以配合原裝底座黏喺單車、頭盔甚至船身上；而且備有1,200萬像素鏡頭，可以拍攝相片及30fps嘅1,080p影片，加上135度廣角鏡頭，最啱用嚟玩第一身攝影。雖然Cam仔冇預覽芒，不過用家可以透過專屬App《Action Connect》，將影片、相片過落手機或Tablet睇，仲可以用App遙距控制隻Cam。最驚喜都係廠商同步推出Ego727專屬40米水深防水外殼，重製番套《魚樂無窮》都好喎！

查詢：（a）3188 0268　（b）2245 7773