上海直擊大芒怪Xperia Z Ultra

仲記得幾年前，聽到4吋芒手機大家已嘩嘩聲；時移勢易，家陣5吋機又已經嫌唔夠大。日前Sony Mobile於上海舉辦「2013夏季新品發布會」，並公布最新大作Xperia Z Ultra。這新機最勁就係採用巨型6.44吋靚芒，屏幕比一眾對手大成個碼；難得機身咁大，卻只厚6.5mm，薄切手感極佳。加上用四核心CPU、2GB RAM等超班規格，怪不得有外國傳媒笑稱此機做「Monster」！

售價及推出日期待定

全場近500座位都爆滿，大部分係大中華區傳媒和嘉賓。

個個都對呢部巨芒機極有興趣，想玩都要排一陣隊。

Sony Mobile的CEO鈴木國正（Kunimasa Suzuki）都有現身撐場。

AppDrawer嘅新介面可以有效分類，搵Apps容易得多。

新版「相簿」可以整合PlayMemories Online服務，同步至不同裝置。

「迷你鍵盤」方便單手打字，大芒也不成障礙。

「Walkman」同樣換上新裝，易睇易用得多。

STAMINA模式可以有效延長待機時間達四倍，夾埋粒3,000mAh電池，約可用八至十小時。

拍埋5吋芒嘅Xperia Z（右）一比，就知Xperia Z Ultra個芒有幾大。

耳筒冇咗保護蓋，聽歌方便好多。

機身只厚6.5mm，手感亦唔錯。

即場有齊晒咁多款筆畀你試畫、試寫，又幾靈敏喎！

試相
影上海夜景，雜訊偏多，不過對焦尚算快而準；此外亦冇LED燈補光。

試片
睇內置嘅高清片，色水自然冇味精，解像度都一流！

SBH52 NFC耳機

SmartWatch 2

高清巨芒

今年Sony活躍又積極，年頭推出嘅Xperia Z手機大賣，早排出埋「阿哥」Xperia Tablet Z，而今次上海發布嘅Xperia Z Ultra就屬同一系列之新作。此機用上6.44吋屏幕，尺寸夠大之餘，連解像度都去到Full HD級數；屏幕更用上目前最新TRILUMINOS Display for Mobile技術，據講可增加色彩層次兼保持顏色自然。另外此機仲採用X-Reality for Mobile顯示引擎，懂得自動分析畫面線條，令畫面更銳利。現場試玩，Xperia Z Ultra個大芒色水確實豐富，而且可視角度夠闊，唔會偏色，成班人睇YouTube都唔會白朦朦。

鉛筆畫芒

平時大家篤芒一係用手指，一係就用觸控筆，今次Xperia Z Ultra竟然用鉛筆都得！皆因屏幕改用全新技術，HB鉛筆、觸控筆或者原子筆都認到。現場有唔少人圍埋起勢一試此噱頭，小記都唔執輸，用鉛筆試吓畫嘢，反應都好流暢，只有輕微Delay，屏幕又不留筆痕。這個功能應用範圍都幾廣，包括可以喺《Sketch》畫嘢、《Note》寫字記事，就連手寫輸入都用得着，十分實用。第二時見有人用鉛筆篤芒，就咪大驚小怪！

6.5mm薄切

Xperia Z Ultra雖然有個逾6吋屏幕，不過現場可見，男、女用家都可以單手拎機傾電話；皆因此機設計系出Xperia Z，窄邊框之餘仲大玩薄切，機身僅厚6.5mm，僅重212g，手持自然。若然想單手WhatsApp都冇問題，皆因佢內置「迷你鍵盤」功能，可將虛擬鍵移埋一邊，打字即時輕鬆得多。同Xperia Z一樣，新機備有黑、白、紫三色，就連用料都似足，用強化玻璃製作機面和機背，亦設有金屬電源鍵，至於邊框就換上金屬物料，外觀更見高貴，實在抵讚。

頂級規格

名字叫得做Ultra，規格當然有所升級，最驚喜係採用Qualcomm新研發嘅Snapdragon 800四核心處理器，時脈「升呢」至2.2GHz，仲有2GB RAM。雖然測試機運行唔到Benchmark，不過推動高清超大芒都仍然順暢自如，效能可見一斑。值得一提，此機支援IP55/IP58標準，防塵固然冇問題，就算在1.5米水深都可撐到30分鐘。而小記最鍾意就係耳筒插口冇保護蓋，啱晒成日用手機聽歌嘅用家，唔使次次揭蓋咁麻煩。各位想換新機都唔使等好耐，因為香港方面已經公布將於第三季推出。