adidas Nitrocharge Start Your Engine
一隊波11個人之中，邊個位置最難踢？筆者有兩個答案，就係翼衞加防守中場，事關攻守都關佢事，全場不斷上上落落，真係少啲速度、體能都踢唔掂！正所謂工欲善其事，必先利其器，一對着得舒舒服服嘅傳統真皮Boot，有；幫球員跑快啲嘅波Boot，亦有；控球射波準啲嘅，都有；但係你又有冇聽過，有波Boot着咗可以好力啲，幫你跑足全場依然咁好狀態？之唔係依家洲際國家盃上，巴西嘅丹尼爾阿維斯（Dani Alves）、西班牙嘅查維馬天尼斯（Javi Martinez），以及意大利嘅迪羅斯（De Rossi）都着緊嗰款銀藍色嘅adidas Nitrocharge囉！
Nitrocharge 1.0 TRX FG $1,699(另有SG版售$1,899)
Nitrocharge備有三種級別，1.0為最高檔次，2.0次之，3.0最為入門化，售價自然亦有明顯出入，豐儉由人。
外底採用Sprintframe技術製成，比起傳統嘅厚身鞋底，更輕巧、反應更直接。
鞋身中至後段都用強化尼龍製成，留意白色嘅三間商標上仲有微細嘅凸凹坑紋，一定程度上可以加強控球效果。
鞋頭與鞋踭都有保護墊，具有一定程度嘅卸力作用。
鞋頭黃色部分就係高彈性橡膠製成嘅Energysling，支撐效果相當明顯。
鞋底黃色嘅之字形部分，就係具有回彈作用嘅Energypulse。
Nitrocharge 3.0 IN $499
Nitrocharge 2.0 TRX TF$799
Nitrocharge 3.0 TRX AG$499
丹尼爾（圖）同查維馬天尼斯都被分類為Engine型球員，所以三間牌嘅宣傳照上都將佢哋機械化。
查維馬天尼斯
Nitrocharge 1.0練習球衣$359
Nitrocharge 1.0練習長褲$459
Nitrocharge 1.0 3/4練習褲$329
Nitrocharge 1.0練習褲$259
Dolan
李健和
睇見引言嘅人名，就知非善男信女，查維馬天尼斯同迪羅斯都係出晒名嘅「Box to Box」球員，即係由自己禁區頂到對方禁區頂呢片遼闊「疆土」，都係佢哋嘅勢力範圍，全場不停瘋搶對手；至於翼衞嘅丹尼爾一樣咁「喪」，將成條右路變做自己嘅私家走廊，喺自己底線截波，再跑上對方底線出波，90分鐘內重複N咁多次，仲要成功率奇高，令對手次次食塵。adidas就與著名嘅體育數據供應商Opta合作，深入分析呢類型運動量超大、覆蓋面廣，而且效率超高嘅球員特性，將佢哋統稱為「引擎」（The Engine）。
Keep住體能 爆足全場
adidas咁大陣仗，無非想為The Engine呢類新世代球員設計出Fit晒要求嘅新波Boot，對佢哋嚟講，體能（Energy）就係最重要嘅武器，無論前後左右進攻防守，如果每個動作都可以慳到力，換言之，即係有更多體能應付90分鐘賽事，甚至打到加時依然可以滿場飛，原理就好似跑車，假設原本嘅耗油量係100km/8L，依家100km/7L都得，即係話多咗1L油，踩油加速就可以更加肆無忌憚啦！
Nitrocharge嘅最大設計特色，就係幫到用家喺體能運用上更有效率，首先鞋底內藏之字形嘅高彈力物料Energypulse，原理就好似彈簧，當用家起步時腳尖蹬地嗰一刻，就會發揮反彈作用，令步伐變得更有力，衝刺加速最見效用。另一方面，鞋面前半段被一條黃色粗邊包住，唔只Eye Catching，仲有好大效用，原來佢都係用高彈性嘅橡膠製成，名為Energysling，當用家進行橫移及轉向動作時，就會發揮穩定前掌嘅作用，尤其是當你用腳外側做重心腳，進行急停連帶急速轉向時，既可撐住腳掌，以防過度外移導至扭傷，又可憑藉高彈性做到力量回饋，邊線球員一定用得着。
前後加Pad 保護性高
Engine型球員往往要主動上前搶截，短兵相接硬碰硬，受傷機會自然高，故此Nitrocharge唔只幫用家慳番啲力，仲起到「護甲」嘅作用，首先鞋頭以至鞋踭都有明顯嘅墊位，發揮卸力作用，唔理對手有心定無意，畀佢踩中鞋面或者踢後腳時都冇咁傷。除此之外，鞋身中至後段就用韌度極高嘅尼龍網層製成，既有保護作用，並且集透氣與輕量化效果於一身；至於前段鞋面用Hybridtouch製成，屬於品牌專利嘅混合物料，既似真皮般柔軟貼服，又有人造物料定型力強、防水度高嘅優點，藉此帶嚟舒服嘅穿着感受，以及出色嘅控球效果。如果你本人或者隊友屬於Engine型球員，梗係要介紹Nitrocharge畀佢試試，反之對手都有「Engine」存在嘅話，就千祈咪畀佢知有呢款鞋上架，否則畀佢如虎添翼嘅話，小心次次將你Tackle冇晒癮。
設計主腦有料爆
早前喺倫敦舉行嘅adidas Football Innovation Lab活動上，Nitocharge亦趁機舉行咗正式首展禮，設計主腦Aubrey Dolan（adidas Global Category Manager for Football）亦親臨其會，向到場傳媒講解新波Boot嘅功能特性，筆者乘機纏住Dolan唔放，要佢爆多啲Nitrocharge嘅設計秘密畀大家知。
D：Dolan S：The Sun
S：其實Nitrocharge係唔係Crossover咗籃球鞋(口架)？嗰條黃色嘅Energysling，作用同籃球鞋嘅鞋面搭帶好似喎，好似adidas TS Commander 2010，就有三條咁多。
D：唔係呀，老老實實，我設計Nitrocharge嗰陣，真係冇諗過任何同籃球鞋有關嘅嘢。其實打從一開始，我哋就以為用家體能補強為大方向，因為我哋觀察到足球員要頻頻進行轉向動作，咁會消耗唔少體能，所以設計出Energysling用嚟對正下藥，而且鞋底嘅Energypulse，比起傳統結構可以增加63%嘅能量回饋。我相信因為打籃球會進行好多Side Cut動作，類似足球嘅橫移轉向，所以籃球鞋鞋面嘅搭帶，同Energysling產生異曲同工嘅效果，同樣用嚟加強穩定性，講真嗰句，我都冇見過你提嗰款籃球鞋喎。
S：點解Nitrocharge嘅鞋面咁得意，前面用Hybridtouch，其餘部分就係強化尼龍？既然Hybridtouch又軟又防水，點解唔成對用晒呢？
D：強化尼龍結構除咗方便喺踭位加Pad外，而且特別堅韌、耐磨，事關我哋好仔細咁觀察過丹尼爾、迪羅斯嘅踢波風格，佢哋腳掌嘅中、後段好易同對手碰撞、摩擦，所以Nitrocharge就喺呢啲位置用咗強化尼龍，增加保護性及耐用性。
S：你哋將Nitrocharge嘅用家定性為「The Engine」，咁喺咁多位星級用家之中，你認為邊副「偈」係最勁呢？
D：Haha，Good Question喎！我嘅答案係丹尼爾，因為佢踢波就好似發電機上身，由一開波就喪跑到最後一分鐘，絕對係Box to Box球員，成身精力好似用極都唔完。其實迪羅斯都係好有代表性嘅「引擎」，佢嘅踢法好有侵略性，十足一個戰士咁款。
S：做着丹尼爾同迪羅斯嘅對手，可以話係多得你Dolan唔少，佢兩個已經出晒名難對付，依家你仲整對咁勁嘅Boot畀佢哋，太屈機喎！（呢幾句係筆者嘅心底話啫，冇講出口，各位讀者咪翻譯畀佢知呀！）
和哥有Say
除咗前文提到嘅幾位國際球星，如果你問我，邊個香港球星最襯Nitrocharge？我會答：「李健和！」我知我知，和哥已經掛咗靴嘛，但係要數香港最出名嘅邊線球員，我始終覺得和哥係No.1囉，早前知道和哥都有試着Nitrocharge，一於打蛇隨棍上，問問佢有咩評語先。
L：李健和 S：The Sun
S：和哥對呢款新鞋有咩「着後感」呢？
L：呢款鞋好特別，有真皮（編者按：Hybridtouch），又有尼龍網，係第一次見到有波Boot咁做。其實我着咗adidas嘅波Boot都有30幾年，以前啲鞋係全真皮做，都幾重(口架)，近幾年不斷有改良，有全真皮嘅，又有全人造皮嘅，依家就將真皮同尼龍網結合。我哋呢班年紀大少少嘅球員，鍾意着真皮多啲，比較舒服、貼腳，呢款鞋就加埋尼龍，變得好輕，舒適度相當好；對我嚟講，人造皮雖然較輕又防水，但係貼腳程度始終唔及真皮，因為真皮就可以因應腳形而變化，皆因我鍾意着得貼腳啲。
S：我見和哥都着過好多款adidas嘅波Boot，有World Cup、Copa、Nitrocharge、Predator同埋adipure，你對邊款有最深印象？
L：一定係Copa啦，佢係adidas嘅經典鞋款，30幾年前已經有，到依家都仲咁受歡迎，佢已經係一個經典啦！近代嚟講，我都幾鍾意Predator，因為好舒服，Predator都有好多年代之分，大約七、八年前嗰款我就最鍾意，因為全真皮製，我好鍾意嗰個年代嘅鞋形。啱啱初步試咗Nitrocharge一陣，仲未真正着嚟比賽，不過都喺草地跑過一陣，初步嚟講好舒服；揀Boot第一要點係着咗落去，行起上嚟會唔會唔自然呢？呢點係好重要，鞋釘好影響到比賽，一着上去有少少哽住哽住，就已經唔舒服，好難再比賽落去，會令表現大打折扣。
S：和哥你都係Engine型球員，喺條右路不停上上落落，打晒咁滯，可唔可以分享吓體能控制嘅要訣呢？
L：平時當然要有一定路程嘅操練，至於落場比賽，就唔好做出不必要嘅跑動，點樣可以留力，呢樣嘢就好講經驗判斷。
S：最後想請和哥畀啲揀Boot貼士，我諗好多朋友都有呢個疑問，就係買波Boot時應該照番平時着鞋嘅Size，定係買細少少呢？
L：我會買細少少，貼腳啲，因為咁先發揮得到，如果對鞋太大，急停時對鞋會有過多空位造成郁動，當然都唔可以太逼，稍為貼少少，啱啱好就OK，鞋同腳融為一體，先會有球感，波Boot係需要着一、兩次，鞋面先會慢慢鬆，如果一開始太鬆，之後都唔啱踢。
查詢：2789 8198（旺角豉油街adidas Megastore）、2730 0157（尖沙咀漢口道adidas旗艦店）
