$5,980（淨機）
$6,079（連廣角鏡套裝）

DV機兼具投影功能，其實唔係新鮮事，若然加埋四防功能大家又點睇？Sony全新推出的Handycam HDR-GWP88VE唔單止係四防全天候DV機，防水、防塵、防震和防寒統統做到，最大賣點是內置投影功能，去船P時可拍低一大班人的嬉水開心時刻，回程時仲可以圍埋坐定定重溫片段。

$5,980（淨機）
$6,079（連廣角鏡套裝）

小小的LCD投影鏡頭可投射100吋大畫面。

密封式設計鏡頭唔單止防水防塵，仲有十倍變焦能力。

為免屏幕翻起時企唔穩，所以特別在底部加建隱藏式支架，投影時可以企穩。

最易入水的電池匣和插卡槽設有防水軟膠保護。

機頂備有變焦收音咪，音效的臨場感十足。

按鍵操作簡便，並設有獨立的「Projector」投影鍵。

幾乎所有設定都係靠3吋的觸控屏幕選擇，反應都算幾靈敏，拍得住智能手機。

內建GPS定位系統和79個國家的地圖，喺邊度拍片和影相都一目了然。

支援1,080@50p質素的全高清影片，Bitrate有成28M，畫面細緻且流暢度高。

GWP88VE影相一樣咁勁，提供2,040萬像素的超高解像度，還是16比9的長寬比。

試片
利用編輯軟件將影片擷取畫面，顏色豐富且細膩，密集的樹葉可逐一細數。

全天候標準四防

Sony去年推出首部三防DV GWP77VE，今次再度發功，推出GWP88VE，將三防強化至四防效能；當中包括10米深度防水，其鏡頭、屏幕和電池匣經過特別處理，有效阻隔水滴入侵；至於其1.5米防撞能力，就算唔小心甩手凌空墮下，亦能確保機身安然無恙；再加上-10℃的防寒能力，去到冰天雪地都能夠運作正常；最後當然係抵禦沙石入侵的防塵能力，去沙灘都唔使驚沙粒會暗藏在機身的夾縫之中。另外，GWP88VE還內置GPS定位系統，去過邊影過咩都一清二楚，啱晒經常戶外拍片的用家。

100吋投影分享

GWP88VE唔單止入水能游、出水能浮，其屏幕前方還有個LED投影鏡頭，按下機背的「Projector」鍵，即可投放足足100吋畫面，而屏幕上方還設有撥桿方便用家調校對焦，只要你屋企的牆壁夠大，就可以跟親朋戚友分享珍貴片段，唔使好似以前啲DV機咁逼埋一齊芒仔睇片。GWP88VE的槍型設計不但方便單手手持，機身前方更配置了前置拍片鍵，只要反芒擰向自己再按鍵，便可以輕鬆自拍，至啱經常獨自去旅行的用家，記低旅行點滴，加上有個3吋觸控屏幕，基本上大部分設定都係靠篤芒搞掂，操作相當簡便。

外接廣角鏡更Wide

唔好以為GWP88VE專攻拍片，影相一定唔掂，其實佢唔單止可以拍1,080@50p的全高清短片，仲可以影埋2,040萬像素的高質相片。GWP88VE內置了16GB容量畀你儲存影片和相片，若嫌唔夠用，亦可以外置microSD記憶卡。此外，GWP88VE配備了一支29.8mm的十倍變焦鏡頭，當然唔少得招牌的SteadyShot光學防手震，保持影像穩定清晰。如果想擴闊鏡頭焦距影得更Wide的話，則可選配0.8×的VCL-HGE08G廣角轉換鏡頭，能夠令DV變為23.8mm超廣角，用作水底拍攝或者大合照就Fit晒。

SPEC

感光元件：502萬像素Exmor R CMOS

等效焦距：29.8~298mm

光　　圈：F1.8~3.4

屏　　幕：3吋46萬像素

其他功能：內置GPS、3lux低光攝錄

體　　積：40×108.5×70mm

重　　量：210g

查詢：2345 2966