廿四孝Joey 代子試車
售價：$4,385,000起
上揭式車門設計，猶像一頭巨鷹展翅，極具氣勢。
鄧建明（Joey）除了是音樂人和好爸爸，原來也是車迷一名，不過他自言每當與就快12歲的兒子鄧朗堯（Justin）傾車經，反而會被兒子考起。Joey直言Justin是個狂熱小車迷，自小便很喜歡超跑，家中收藏約150輛模型車，當中逾50輛都是超跑型號，在芸芸選擇之中，Mclaren MP4-12C Spider便是Justin的最愛，今次就由Joey代兒試車，回家後再一齊分享。
Mclaren MP4-12C Spider
售價：$4,385,000起
上揭式車門設計，猶像一頭巨鷹展翅，極具氣勢。
車廂布局極盡簡潔，讓駕駛者的全副心神集中在操控之上。
錶板組合由單一大圓轉速錶搭配兩旁的行車資訊屏幕組成，分門別類、清晰易讀。
3.8L V8 Twin Turbo引擎，馬力高達625ps，唔快就怪。
車尾設有電動升降擾流尾翼，高速時能夠加強下壓力。
Joey大讚桶椅造型夠貼背，令腰背得到充分承托。
對港人而言，與車有關、又最入腦的粵語流行曲，非太極的《紅色跑車》莫屬，「紅色的跑車a像是帶着神秘……」依然Hit到今天，Justin會否也受到感染，對紅色跑車分外着迷？Joey笑說:「雖然個仔沖涼時都會哼呢首歌，不過我諗應該唔關事。」正如大部分爸爸都要忙於工作，Joey自言經常出Show，兒子何時成為車迷，太太又何時開始投其所好都不察覺，直至多年前兩母子突然持着一份歐洲車的簡介單張，游說他換車時才恍然大悟。他表示自己是個「節儉人」，以前一直以日本車代步，但由於母子同心，加上當時歐洲車價變得「親民」，於是扑錘「轉會」，直到現時揀車，兒子都有份出主意。Joey又指Justin原本都想參與今次訪問，奈何為了應付考試，只好乖乖留在家中溫習，無緣與Dream Car相會。
雷仲德借DVD
Joey指Justin不但收藏了很多汽車模型，平時又愛看外國車書及《Top Gear》節目，在家中剪頭髮也要「刨」與車相關的DVD，Joey更謂要特別多謝雷仲德（Mark Lui）：「阿Mark個Studio擺咗好多首辦模型車，仲有大量《Top Gear》DVD，每次上去都叫Justin隨便揀，借畀佢返屋企慢慢睇，好多碟都仲未還。」又指每次一家人去日本旅行，除了逛唱片店，模型車舖也是指定行程。Joey抿着嘴笑，繼續大談父子點滴：「佢喺街見到鍾意嘅車，就好想去行近佢，又會即時拎起部手機影相，記得有次喺石澳食晚飯，見到有部好罕見嘅超跑，我唯有代個仔出頭，同車主提出要求與其愛驅合照，結果Justin開心咗成晚。」
影車似傳媒
Joey說起愛兒的嗜好，不禁滔滔不絕：「之前有朋友買咗部超跑，個仔見到開心到跳起，用部手機喪影，內內外外，甚至頭冚底下嘅引擎都唔放過，十足傳媒影車咁專業。」Justin愛睇車、影車，近年更嘗試畫車，並曾向Joey表示，長大後想做汽車設計師，Joey聽到也感到開心，而且第一時間鼓勵他：「咁你要畀心機讀好啲書，尤其是數學科，否則將來設計唔到好車o架！」
後記：試坐都腳軟
完成拍攝後，Joey急不及待展開試乘體驗，在石澳一帶山路兜了一圈，下車時笑着說：「嘩，腳軟喇！」筆者回應：「你講笑咋！」豈料Joey一臉認真地說：「唔係呀，真係腳軟o架！」他解釋是第一次一邊聽着從車尾V8 Twin Turbo引擎傳出的沉厚咆哮聲，一邊體驗高速的快感，又表示在入彎前的一刻，確實有點驚，但MP4-12C Spider又快又穩的攻彎表現，令Joey下一秒已經由驚變喜。筆者祝願在不久將來，Joey也可重溫這種過癮經驗，不過身邊並非車行司機，而是Justin揸車與慈父齊齊遊車河。
汽車查詢：2893 1888（McLaren HK）
