《Remember Me》改記憶反監控

《Remember Me》乃以竊取及竄改記憶為主題的遊戲，由法國DONTNOD Entertainment開發，跟由荷李活影星Ellen Page擔綱「演出」的《Beyond Two Souls》開發公司Quantic Dream分屬同鄉。不約而同，兩隻法國遊戲都大膽創新，絕非美國遊戲橋段咁Play Safe！本作要控制女主角Nilin搗破控制記憶的邪惡組織，拯救自己，亦拯救大部分人類，主線係靠Hack入其他人記憶，再加埋少不了的搏鬥場面，啱晒想玩新嘢嘅Game迷！

《Remember Me》改記憶反監控

女主角Nilin造型好Cyberpunk，右手更係機械臂，真係好有型！

《Remember Me》都有喪屍？原來佢哋係變種人Leapers，當打喪屍就得！

Nilin右手機械臂可從敵人頸後插入偷取記憶，勁！

動作畫面未算做得好高質，但總算夠刺激。

可以在遊戲中暫停時間，再利用空檔諗計完成任務。

Hack入人腦竄改記憶，如果成真都幾得人驚！

唔好以為Nilin只是女流之輩，但佢嘅身手都唔錯，唔係得Hack人一招。

因為開發小組唔太願意用真巴黎做背景，惟有將場景改成2084年的新巴黎，遙遙呼應《1984》。

打人出招都有啲似《Matrix》！

2084年巴黎大洗腦

《Remember Me》最吸引係遊戲的故事設定，原來於2008年開發時，最初設定為世界受溫室效應而導致洪水氾濫，主角要靠噴射衣穿越海岸線執行任務；後來開發小組決定將世界設定改為2084年的新巴黎，世界受The Memorise Corporation所支配，佢哋發明了名為Sensen的晶片，植入人腦以控制記憶，當時有99%人已經被洗腦；至於剩低的人類就組織起反抗組織「Errorists」。一講記憶，大家或者會覺得係咪抄《Matrix》，開發小組冇承認，但係話有參考George Orwell經典小說《1984》，人人都生活在「Big Brother」的監視之下。

改變事實過關

至於故事主角係造型好Cyberpunk嘅Nilin，原本佢都已經被洗腦，仲幫The Memorise Corporation獵取其他人的記憶，點知因為特別事故而被冤枉為頭號通緝犯，所以就覺悟起來，連同「Errorists」合力反抗，想拎番自己記憶，所靠的是她超強的駭客能力，可以隨心所欲闖入他人的記憶，再從中改變環境同物件，繼而改變他人記憶以達成任務，例如可以用念力將手槍解鎖造成誤殺，或者可以諗計避開危險，玩法夠晒新鮮，亦令人想起年底會推出同類靠Hack的大作《Watchdogs》！由於開發公司係來自法國，要打造「新巴黎」可謂駕輕就熟，齋睇遊戲場景都好有法式未來感覺，仲話部分概念係取經自Facebook、Twitter、Tumblr等社交網絡喎！

小野義德助拳

本作仲有刺激的動作場面，「街霸」著名製作人小野義德更有份擔任遊戲動作戰鬥系統部分的開發顧問添！玩家可以隨時暫停畫面，在有限時間內選擇攻擊武器甚至放炸彈；此外更引進一套可以自Chok連招的「Combo Lab」系統，可以從四種移動招式「Regen」、「Power」、「Chain」同「Cooldown」中組合，開發小組話可以組合出超過5,000種連招，認真犀利！女角Nilin仲可以喺遊戲入面學到各種「超必」，如可以同時電一群敵人，令到敵對機械人變成自己幫手，仲可令到佢自爆，創意無極限。遊戲會在驚險時間，加入慢動作鏡頭，提升遊戲的電影感，外地有名的遊戲網普遍都畀七分或以上，所以都值得一玩o架！