攝星掛電

想喺香港影到一張似樣少少嘅星空，起碼都要幾十張相疊埋先叫有啲嘢睇。用赤道儀追星自然不可少，但影幾十張又要長曝光，電量就變得非常重要，相機就話可以隨時換電，小記支「鉸剪」赤道儀就唔係咁易話為，一定要12V供電先收貨，唔用牛的話，雖然可以用入電芯嘅電箱，但係一個鐘左右就乾塘，真係令人好頭痕。好彩行街時見到呢舊「艾鑊」舊款外置電池，得佢先有罕見嘅12V輸出，電量都足夠影足一晚！問過店員，呢個牌子啲新款已一律改晒得5V輸出，遲啲舊電打柴真係唔知邊度先買得到，不過暫時有得用就唔好理咁多喇！