林肯上身 傳奇重現

導演揀戲拍，有些純粹為賺錢，另外有些是為了博攞獎；史提芬史匹堡執導的《林肯》肯定是後者，史詩式人物傳奇已是攞獎格局，加上以美國總統林肯為主角，還邀請到金像影帝丹尼爾迪路易斯演出，奧斯卡獎項還不手到拿來？結果，最佳電影及最佳導演都雙雙失落，只取得最佳男主角與最佳美術設計。最近《林肯》推出藍光碟，小記終於有機會欣賞，起初預計會相當沉悶，但睇睇吓卻相當入戲，丹尼爾迪路易斯收放自如的演出確是一絕，聽講他用了一年時間來揣摩林肯的內心世界，演技果然爐火純青。但如果你睇睇吓奇怪，為何睇了成個鐘林肯都未出動去殺吸血鬼？唔好意思，你買錯碟了，你想睇的那套是《吸血鬼獵人：林肯》。