《討鬼傳》和式剿鬼
六月底推出的《討鬼傳》是由開發「無雙」系列聞名的Omega-Force主理，莫非又係一隻不同時空背景的「無雙」？不過Omega-Force就頗有新意，開創出一個以日本古代到幕末時代四人聯手出招獵鬼的故事，並非「無雙」喪劈式玩法！雖然有人批評話似《鬼武者》同《Monster Hunter》的混合體，但筆者就覺得最緊要係有新意，例如遊戲中要斬甩巨鬼手手腳腳再超度，就已經夠幾有趣！
《討鬼傳》和式剿鬼
要逐點擊破，斬甩鬼Boss的軀幹先可以完全擊倒，極之特別。
好有霸氣的鬼Boss業燄魔，驟眼睇似牛魔王。
外形「四不像」的大型鬼Boss風切，睇圖都知佢以行動迅速見稱。
遊戲內可以蒐集魂魄加強自己實力，好似源賴光、安倍晴明等戰國名將魂魄都能夠收為己用。
跟其他同類遊戲都好似，可支援到四人連線出戰。
鬼Boss野槌外形都幾鈍，攻擊手法看來都係放毒！
長得又似蜘蛛又似蟹嘅小鬼專門放毒，仲會大規模出動！
遊戲開始時可揀男武士或女武士參戰，人設方面都幾有《戰國無雙》風格。
《討鬼傳》遊戲連PS Vita主機同綑版機背會用上日本傳統朱紅色繪製標誌及水墨風「鬼」圖案設計，和風味濃，好有氣勢！ $2,380
時空挪移打到幕末
雖然開發小組刻意求變，但遊戲背景設定都幾一貫Koei風格。故事背景舞台因為「鬼」的力量而造成時空歪斜的異世界，同《Orochi無雙》相似。玩家扮演身處討伐鬼的組織「武士」據點之一的新手武士，然後再穿越時空，從日本古代打鬼打到幕末時代，充滿大和風味。跟同廠的《戰國無雙》不同，遊戲並非打武將，而係打鬼；不過遊戲中的鬼卻非虛無縹緲，而是奇形怪狀的實體鬼怪，由嘍囉的小型鬼，到幾個人高的巨鬼Boss都有，長打長有，你話似《Monster Hunter》又得，或似《Soul Sacrifice》都得！
超度軀幹免重生
一般這類狩獵動作遊戲都是集幾人之力，夾手夾腳用盡各種武器將Boss擊倒，但係《討鬼傳》就不同，單靠普通攻擊係不能斬殺Boss，必須使用部位攻擊才成！所謂部位攻擊，係先要將鬼Boss的內在魂魄逼出表面，這時候鬼Boss會進入「禍靈化」，然後就可乘勢斬甩Boss的軀幹。有趣的係被斬甩的軀幹會在一定時間後重生，到時又要從頭打過，所以要使用「光之陣」為甩掉的軀幹超度！不過要留意受重傷後的鬼Boss會進入「蝕魂」狀態，變得異常殘暴，想趁佢病攞佢命絕不容易！
蒐集魂魄加強實力
魂魄貫穿整個遊戲，好似之前話超度鬼Boss軀幹就可去除惡靈，但魂魄都可以幫到玩家手，正如斬甩鬼Boss軀幹後所釋放的魂魄，係可以寄附在武器之上提升戰鬥力！如儲滿魂魄計，武士就可以發動到「鬼之眼」，並能夠透視鬼Boss的生命力；發動「鬼千切」就可以短時間內爆Seed，將小鬼一拳打低，總之一切都關「鬼」事。當然一個人打鬼唔夠過癮，《討鬼傳》可以支援四人近距離Adhoc攜手出戰斬鬼，甚至不限於PS Vita平台；遊戲本身有出PS Vita和PSP版本，只要大家都有手提機加遊戲，就可跨平台出戰。如果想上網同其他朋友一齊出征戰鬥的話，就只得PS Vita版本有這個功能。而只得PSP但冇PS Vita的玩家，則可以考慮《討鬼傳》的遊戲連PS Vita主機同綑版，機背設計都真係幾有型！
INFO
類型：狩獵動作
開發：Omega-Force
平台：PS Vita、PSP
推出日期：6月27日
售價：$388（PS Vita及下載版）
查詢：2341 2356
