薄荷SO-04E 清涼下水禮

薄荷SO-04E $4,680

天時暑熱，有咩好得過去玩水消悶氣；「o架仔」最知消費者嘅心意，DoCoMo早前公布嘅2013年夏天新機當中，大部分都支援防水標準。當中SO-04E（亦即Xperia A）話咁快已經由水路抵港，機身設計精緻，最正就係大玩激罕薄荷配色，拎埋落水玩就零舍透心涼！

薄荷SO-04E $4,680

機側設有實體快門鍵，半按反應快，影夜景都冇咁易手震。

連手機繩孔都有，女仔實啱用。

可以隨時拆殼換電，不過換完記住蓋好，唔係防水功能就失效！

機前底部設有LED燈，叉電會着，燈光亦會因應顯示相片嘅色調而轉換。

機背殼有少許磨沙質感，手感不俗。

有充電底座跟機，插機即叉，連USB保護蓋都唔使打開。

拍埋Xperia Z（左），兩機設計相似，不過此機（右）就細一個碼。

此機採用Qualcomm最新四核心處理器，效能超強。

支援xLOUD技術，喇叭播歌夠晒響亮。

內置省電模式，仲可以自設定時啟動，慳電效果都唔錯。

Socialife可幫你整合Facebook、Twitter等社交網站，一頁睇晒朋友近況。

激罕清新配色

講設計，日系手機向來唔差，新機SO-04E都唔例外；簡約外形擺明師承Xperia Z，就連四側嘅條狀裝飾、金屬電源鍵等特徵都保留晒，不過機身邊角位就更加流線型，拎機時冇咁頂手，手感都算唔錯。齋靠設計老本當然唔夠，所以此機仲玩埋顏色，除咗有大路嘅黑、白、粉紅之外，仲追加手機界罕見嘅「Mint」薄荷色，配色好清新，而且感覺超Young，後生仔、女應該都鍾意。據講今批貨薄荷色數量少，仲好搶手，睇啱就要快啲扑錘出手喇！

秒速快攝

高像素鏡頭亦都係近期手機之必備規格，所以SO-04E都備有1,300萬像素鏡頭，而且仲內置埋Exmor RS for mobile影像處理器，日景、夜攝嘅相片質素都唔錯，擺上《Facebook》、《Instagram》肯定夠撐。要讚嘅就係右邊機側再次加入實體快門鍵，拍攝時可以半按對焦之外；最爽係熄芒待機時，長按快門鍵就會即時啟動相機功能，全程只需一秒左右，啱晒鍾意Snap嘅用家。比較可惜係前置鏡頭只得VGA 30萬像素解像度，自拍唔夠靚，美中不足。

1.5米防水

話明係夏天新機，防水標準梗唔少得；此機就支援IPX5/8防水標準，於1.5米水深都可以正常運作30分鐘，拎落水影相都唔驚壞機！不過跟Xperia Z唔同，SO-04E並唔係一體成形設計，所以緊記將機背殼、機側嘅插口保護蓋統統閂實先好落水。此外，其4.6吋芒嘅解像度仍然維持720p，好在內置Mobile BRAVIA Engine，色彩、細緻度均不俗；配合1.5GHz四核心處理器以及2GB RAM嘅超班硬件，用來睇片、打機都好流暢。